WhatsApp qoldanushylarǵa arnalǵan qauípsízdík pen paıdalanudy jeńíldetuge baǵyttalǵan bírneshe jańa múmkíndíktí íske qosty.
Endí WhatsApp-ta ekrandy óz kontaktíleríńízde joq adammen bólísuge tyrysqanda, baǵdarlama arnaıy eskertu shyǵarady. Qoldanushy osy tereze arqyly árekettí bírden toqtata alady, - dep habarlaıdy Aqshamnews.kz.
Būl jańalyq telefondy «rettep beremíz» degen jeleumen bóten adamdardyń ekrandaǵy jeke aqparatqa, bank qyzmetteríne nemese qūpıya derekterge qol jetkízuíne jol bermeu úshín engízílgen.
Android júıesíne arnalǵan WhatsApp-tyń jańa beta-nūsqasynda (2.25.34.5) jadty tazalaudyń keńeıtílgen qūraldary paıda boldy. Endí paıdalanushylar: barlyq hat-habardy tolyq óshíruge, tek medıafaıldardy tazalauǵa jáne jeke faıl túrlerín ǵana (foto, vıdeo, qūjat, audıo, stıker) joyuǵa múmkíndík alady.
Óshíru aldynda rastau terezesí paıda bolyp, jūldyzshamen belgílengen mańyzdy habarlamalardy saqtap qalu múmkíndígí beríledí. Būl qajet aqparatty kezdeısoq joıyp almauǵa kómektesedí. Kompanıyanyń aıtuynsha, jańartylǵan tetík chattardy retteudí būrynǵydan da qarapaıym etedí. Qazírgí kezde funktsıya shekteulí túrde ǵana qoljetímdí, al jaqyn kúnderí Android qoldanushylarynyń kópshílígíne taratylady.
Al, 2.25.34.6 nūsqasyndaǵy beta-testíleu barysynda Shake-to-Report dep atalatyn jańa múmkíndík te synaqtan ótude. Telefondy jeńíl shaıqau arqyly qoldanushy bírden aqau turaly habarlau bólímíne kíre alady.
Shaıqau áreketí jasalǵannan keıín qoldanba, būl qadamdy rastaudy sūraıdy. Sondaı-aq, avtomatty túrde skrınshot daıyndaıdy jáne qūpıya aqparat bar aımaqtarda skrınshot alynbaıdy.
Funktsıya qajet bolmasa, baptaulardan óshíruge bolady. Ázírleushíler būl jańalyq qosymshadaǵy máselelerdí jedel anyqtauǵa jáne servıstíń tūraqtylyǵyn arttyruǵa kómektesetínín aıtady.