Ahmet Túzún óz bayandamasynda túrkí dúnıesíníń álemdík mádenıetke qosqan úlesí orasan ekenín atap óttí. Onyń aıtuynsha, túrkí halyqtarynyń dástúrlí kıímderí men qolónerí sózben aıtyp jetkízgísíz baı mūra.
"Myna jerde tūrǵan ūlttyq kıímderímízge qarańyzdarshy, olardy sıpattauǵa sóz jetpeıdí. Olardyń artynda tūtas bír mádenıet, ǵasyrlyq dástúr jatyr," - dedí ol.
Spıker túrkí halyqtaryna ortaq áıelderdíń ūlttyq bas kıímderíníń aluan túrlílígíne erekshe toqtaldy. Ár bas kıím jeke bír tarıh, jeke bír kúres joly. Ahmet Túzúnníń píkírínshe, Túrkí dúnıesíníń Mádenıet festıvalderí qatarynda míndettí túrde ortaq Túrkí Álemí Muzyka Festıvalí ótkízíluge tıís.
"Jas daryndardy tanytatyn, típtí álemdík deńgeıdegí ónerpazdar shyǵatyn úlken mádenı alań jasauymyz kerek," - dedí ol.
Sonymen bírge ol mádenıetpen sabaqtas halyqaralyq sport ís-sharalarynyń da mańyzyn atap óttí. Vengrıyada ekí jylda bír ótetín Tūran Qūryltaıy, álemníń túkpír-túkpírínen túrkí halyqtaryn jınaıtyn bíregeı oqıǵa. Mońǵolıyadaǵy Naadam festıvalí, Túríkmenstandaǵy Aq Baıram, Yakutıyadaǵy Ysyah meıramy, Tatarstandaǵy Sabantuı, Túrkıyadaǵy 666 jyldyq tarıhy bar Kırk Pınar kúres saıystary - mūnyń bárí túrkí mádenıetíníń quatyn kórsetetín ís-sharalar.
Ahmet Túzúnníń aıtuynsha, túrkí halyqtarynyń aldynda tūrǵan eń basty míndetterdíń bírí óz mádenı mūrasyn tereń tanyp, ony álemge tanyta bílu.
"Bízdíń elderímízge keletín sheteldíkter tek sport nemese óner úshín ǵana emes, tūtas mádenıettí,tarıhymyzdy, dástúrímízdí, ruhanı mūramyzdy kóru úshín keluí kerek," - dedí spıker.
Onyń būl oılary forum qatysushylaryna túrkí dúnıesíníń baı mádenı áleuetín pash etíp, osy mūranyń jahandyq deńgeıde nasıhattaluy qanshalyqty mańyzdy ekenínen habardar ettí.