Almaty qalasynda ekí kúnge sozylǵan "Túrkí álemíníń medıa keńístígí: jańa dáuírdegí míndetter men múmkíndíkter" atty VI Halyqaralyq túrkítíldes jurnalıster medıa forumyna arnaıy kelgen Qyrǵyz Respublıkasy Jurnalıster odaǵynyń tóraǵasy Ilyazbek Baltashev óz sózínde túrkí elderíníń aqparattyq ıntegratsıyasy eń ózektí máselelerdíń bírí ekenín atap óttí. Onyń aıtuynsha, qazír óner, mádenıet, kıno jáne basqa salalar boıynsha baılanys jaqsy jolǵa qoıylǵanymen, medıa salasyndaǵy bírlesken jobalar jetkílíktí deńgeıde damymaǵan.
"Qazírgí medıa keńístík óte jyldam ózgeríp jatyr. Tsıfrlyq tehnologıyalar, jasandy ıntellekt, algorıtmder men áleumettík jelíler qoǵamnyń oılau júıesín qalyptastyryp, aqparat qabyldau mádenıetíne tíkeleı yqpal etude. Osyndaı kezeńde ūlttyq aqparattyq qauípsízdíktí saqtau, mádenı kod pen ruhanı qūndylyqtardy qorǵau asa mańyzdy. Áıtpese jahandyq aqparat tolqynynda ózímízdí joǵaltyp alu qaupí bar", - dedí qyrǵyz elínen kelgen ókíl.
Ol būqaralyq aqparat qūraldarynyń mıssıyasy tek aqparat taratu emes ekenín, olardyń ıdeologıyalyq tūraqtylyqty, ūlttyq bíregeılík pen ruhanı tūtastyqty saqtauda úlken ról atqaratynyn basa aıtty. Spıkerdíń aıtuynsha, túrkí halyqtaryn bíríktíretín ortaq qūndylyqtar bar, al sol qūndylyqtardy zaman talabyna saı nasıhattau – ortaq míndet.
Ilyazbek Baltashev túrkí memleketterínde quatty medıa platformalar men aqparat agenttíkterí bolǵanymen, olar bír-bíríníń ónímderín tolyq paıdalana almaı otyrǵanyn synǵa aldy. Onyń píkírínshe, būl ortaq standarttyń, bíryńǵaı tehnologıyalyq júıeníń jáne kelísílgen kontent sayasatynyń joqtyǵynan.
"Eger bíz túrkí elderíníń aqparattyq keńístígín bíríktíretín ortaq jańalyq agregatoryn jasap, ony jasandy ıntellektke negízdesek, būl strategıyalyq serpílís bolar edí. Túrkí memleketteríníń aqparat agenttíkterínen jańalyqtardy bír jerge jınap, bírneshe mınut íshínde búkíl óńírge tarata alatyn tsıfrlyq platforma qūrylsa, jurnalıstıka da, aqparattyq sayasat ta jańasha deńgeıge kóteríledí", - dedí ol.
Spıker forumnyń basty mıssıyalarynyń bírí – osy baǵyttaǵy máselelerdí ashyq talqylau ekenín atap óttí. Túrkí álemíníń ortaq aqparattyq júıesín qūru, kontent almasudy kúsheıtu, tsıfrlyq jurnalıstıkany damytu aldaǵy jyldarǵa arnalǵan mańyzdy strategıyalyq maqsattardyń qatarynda tūr.
Forum qatysushylarynyń aıtuynsha, mūndaı bastamalar túrkí elderíníń aqparattyq táuelsízdígín nyǵaıtyp qana qoımaı, ruhanı tamyrdy, mádenı bíregeılíktí saqtauǵa erekshe úles qosady. Ís-shara ekí kún boıy jalǵasyp, qatysushylar tájírıbe almasyp, ortaq jobalardy júzege asyru máselelerín jan-jaqty talqylamaq.