Iran bılígí AQSh prezıdentí Donald Tramptyń ekí táulíkten keıín ayaqtalatyn ultımatumyna qatań jauap qatty. Mūndaı ūstanymdy ırandyq bírneshe joǵary lauazymdy tūlǵa málímdedí, – dep habarlaıdy aqshamnews.kz tílshísí DW-ge sílteme jasap.
4 sáuírde Tramp Irannyń AQSh-pen mámílege keluíne 48 saǵat qalǵanyn taǵy eske saldy. Onyń aıtuynsha, eger talap oryndalmasa, artynsha joıqyn shabuyl jasaluy múmkín.
"Men Iranǵa mámíle jasauǵa nemese Ormuz būǵazyn ashuǵa on kún bergenímdí ūmytpańyzdar. Uaqyt ótíp barady. 48 saǵattan keıín olardyń basyna tozaq ornaıdy", - dep jazdy AQSh prezıdentí Truth Social jelísínde. Būl mazmūn Reuters pen AP materıaldarynda da keltírílgen.
Tegeran būl ultımatumdy qabyldamaı, AQSh prezıdentíníń ózíne qatań eskertu jasady.
"Iran sení de, sarbazdaryńdy da tozaqtyń túbíne jíberedí. Senderge laıyq oryn sol", - dep jazdy X áleumettík jelísínde Iran parlamentíníń ūlttyq qauípsízdík jáne syrtqy sayasat komıtetíníń tóraǵasy Ebrahım Azızı.
Al Irannyń joǵary áskerı qolbasshylyǵy ókílí general Álı Abdollahı Alıabadı AQSh prezıdentín "agressıv árí soǵysqūmar" dep atap, onyń Iran ınfraqūrylymy men aktıvteríne qoqan-loqy jasap otyrǵanyn aıtty. Onyń sózínshe, eger AQSh tarapynan jańa soqqylar jasalsa, onda amerıkalyqtar úshín "tozaq qaqpasy ashylady".
Būǵan deıín, 22 nauryzǵa qaraǵan túní de Tramp Tegeranǵa 48 saǵattyq ultımatum qoıǵan bolatyn. Sol kezde de ol Ormuz būǵazyndaǵy shekteulerdí alyp tastaudy talap etíp, oryndalmaǵan jaǵdaıda Irannyń energetıkalyq nysandaryna soqqy beríletínín aıtqan. Keıín Aq úı basshysy kelíssózderge sílteme jasap, būl merzímdí bírneshe ret keıínge shegergen.