Qazaqstanda keıíngí jyldary balalarǵa arnalǵan áleumettík sayasattyń baǵyty edáuír ózgerdí. Úkímet tarapynan qabyldanǵan bírneshe mańyzdy bastama jas buynnyń bolashaǵyna salynǵan ınvestıtsıya retínde baǵalanady. Aqshamnews.kz tílshísí mūndaı ıgí bastamalarǵa sholu jasady.
Ūlttyq qor – balalarǵa
Byltyrdan bastap "Ūlttyq qor – balalarǵa" baǵdarlamasy íske qosyldy. Būl bastama ayasynda elímízdegí ár balaǵa jeke esepshot ashylyp, jyl saıyn Ūlttyq qor tabysynyń 50 paıyzy osy shotqa audarylady. Qarajatty bala tek 18 jasqa tolǵanda jáne tek bílím alu men tūrǵyn úı satyp aluǵa paıdalana alady.
2025 jyly 6,9 mıllıonnan asa balanyń atyna alǵashqy salymdar tústí. Būl – memlekettíń bolashaq azamatqa erte bastan qoldau kórsetuíníń naqty mysaly.
2025 jylǵy 1 mamyrdaǵy jaǵdaı boıynsha, 97 615 ótínísh oryndalyp, jalpy somasy 11,49 mıllıon AQSh dollarynan asa qarajat uákílettí operatorlar arqyly ótínísh berushílerdíń banktík shottaryna audarylǵan.
Onyń íshínde Tūrǵyn úı jaǵdaıyn jaqsartuǵa 6,70 mıllıon AQSh dollary, yaǵnı 56 937 ótínísh; al bílím alu úshín 4,79 mıllıon AQSh dollary, 40 678 ótínísh oryndalǵan.
"Jaıly mektep" ūlttyq jobasy
Qazírgí bílím salasyndaǵy basty máselelerdíń bírí – úsh auysymdy jáne apatty mektepter. Osyny sheshu úshín 2023–2025 jyldarǵa arnalǵan "Jaıly mektep" ūlttyq jobasy qabyldandy.
Artsport: shyǵarmashylyq pen sportqa jol ashyq
Balanyń jan-jaqty damuyna jaǵdaı jasau úshín Artsport baǵdarlamasy íske qosylǵan. Būl – ár balaǵa tegín sport jáne shyǵarmashylyq úıírmelerge qatysu múmkíndígín beretín vaucherlík júıe.
2024 jyly Qazaqstanda Artsport baǵdarlamasy ayasynda naqty qansha balanyń úıírmelerge jazylǵany turaly resmı statıstıka álí jarıyalanbaǵan. Al 2023 jyly būl baǵdarlama boıynsha 560 myńnan astam bala men jasóspírím qamtylǵany belgílí.
Densaulyq – basty nazarda
Balalardyń densaulyǵyn qorǵau úshín jyl saıyn skrınıngtík tekseruler, míndettí ekpeler júrgízíledí. 2024 jyly elímízdíń shalǵaı auyldaryna jyljymaly medıtsınalyq keshendermen dárígerler baryp, 21 myńnan asa balaǵa medıtsınalyq kómek kórsetken.
Sondaı-aq, Qazaqstanda alǵash ret "Fetaldyq medıtsınasy" jobasy íske qosylyp, 20 jatyríshílík operatsıya sáttí júrgízílgen. Būl tehnologıyalar ūryqtyń erte patologıyalyq jaǵdaılaryn az ınvazıv emsharalar arqyly túzetuge jáne emdeuge arnalǵan. Olar balalardyń arasynda múgedektíktíń aldyn alu maqsatynda auyl tūrǵyndaryna qoljetímdí bolady.
Áleumettík qoldau: járdemaqy jáne mektepke kerek-jaraq
Bír jolǵy járdemaqy kólemí qazír bírínshí, ekínshí jáne úshínshí balaǵa – 149 myń teńge, tórtínshí jáne odan kóp balaǵa – 247 myń teńge. Kópbalaly jáne az qamtylǵan otbasylarǵa mektep formasy, qūral-jabdyqtar "Mektepke jol" baǵdarlamasy arqyly júzege asady, sondaı-aq, ystyq tamaq, jazǵy demalys lagerlerí men úıírmeler tegín ūsynylady.