Búgín, 2026 jylǵy 20 shíldede, «QazAvtoJol» ŪK» AQ Almaty oblysynyń Qarasaı audanyndaǵy halyqaralyq mańyzy bar «Almaty – Bíshkek» avtomobıl jolynyń 19 – 27 shaqyrym aralyǵyn kúrdelí jóndeu jáne keńeıtu jobasyn resmı túrde bastady, – dep habarlaıdy aqshamnews.kz tílshísí.
Joba Memleket basshysynyń elímízdíń zamanauı kólík ınfraqūrylymyn damytu jóníndegí tapsyrmasyn oryndau ayasynda júzege asyryluda.
Atalǵan joba Qazaqstandaǵy eń qarqyndy kólík dálízderíníń bírín jańǵyrtuǵa baǵyttalǵan. Būl jolmen táulígíne 70 myńnan astam kólík qatynaıdy. Jobany íske asyru Almaty qalasyna kíríp-shyǵatyn baǵyttyń ótkízu qabíletín edáuír arttyruǵa, jol qozǵalysy qauípsízdígín kúsheıtuge jáne qala mańyndaǵy eldí mekenderdíń tūrǵyndaryna, megapolıs qonaqtaryna árí tranzıttík kólíkke qolaıly jaǵdaı jasauǵa múmkíndík beredí.
Saltanatty ís-sharaǵa ortalyq jáne jergílíktí atqarushy organdardyń ókílderí, jol salasynyń basshylary, merdíger ūıymdar men jūrtshylyq qatysty.
«QazAvtoJol» ŪK» AQ Basqarma tóraǵasy Darhan Imanashev būl jobanyń elímízdegí eń írí qalalyq aglomeratsıya úshín strategıyalyq mańyzǵa ıe ekenín atap óttí.
«Memleket basshysynyń tapsyrmasyn oryndau ayasynda bíz Almaty aglomeratsıyasy úshín asa mańyzdy ınfraqūrylymdyq jobalardyń bírín – «Almaty – Bíshkek» avtomobıl jolynyń 19 – 27 shaqyrymyn kúrdelí jóndeu jáne keńeıtu jūmystaryn bastadyq. Būl – Almatynyń basty kólík qaqpasy. Mūnda kún saıyn Qazaqstandaǵy eń joǵary kólík qarqyndylyǵynyń bírí tírkeledí. Jobany júzege asyru joldyń ótkízu qabíletín aıtarlyqtaı arttyryp, jol qozǵalysynyń qauípsízdígín kúsheıtuge jáne júzdegen myń júrgízushí úshín qolaıly jaǵdaı jasauǵa múmkíndík beredí. Būl – kólík ınfraqūrylymyn damytuǵa, óńír ekonomıkasynyń ósuíne jáne azamattarymyzdyń ómír sapasyn jaqsartuǵa baǵyttalǵan mańyzdy ınvestıtsıya», – dedí Darhan Imanashev.
Qazírgí tańda qoldanystaǵy tórt jolaqty avtojol kólík aǵynynyń artuyna baılanysty júktemení tolyq kótere almaı otyr. Sonyń saldarynan tūraqty kólík keptelísterí tuyndap, qozǵalystyń ortasha jyldamdyǵy tómendep, jol-kólík oqıǵalarynyń qaupí artuda.
Joba ayasynda avtojol tórt jolaqtan segíz jolaqqa deıín keńeıtíledí. Nátıjesínde būl uchaske úzdíksíz qozǵalysty qamtamasyz etetín jalpy qalalyq mańyzy bar magıstraldyq kósheníń talaptaryna sáıkestendíríledí.
Kúrdelí jóndeu barysynda:
- «Taǵa» úlgísíndegí ekí zamanauı kólík aıryǵy;
- toǵyz jerústí jayau júrgínshíler ótkelí;
- búkíl uchaske boıynda jayau júrgínshíler jolaǵy;
- syrtqy jaryqtandyru júıesí;
- jańa kúrdelí jol jabyny salynady.
Sonymen qatar joba ayasynda gaz qūbyrlary, su qūbyry jelílerí, elektrmen jabdyqtau júıelerí jáne talshyqty-optıkalyq baılanys jelílerí sıyaqty ınjenerlík kommunıkatsıyalar kóshíríledí.
Joba ayaqtalǵannan keıín Almaty men qala mańyndaǵy eldí mekender arasyndaǵy jol júru uaqyty edáuír qysqarady.
Megapolıske kíreberístegí negízgí baǵyttardyń bíríníń ótkízu qabíletí artyp, kólík júktemesí azayady, jol qozǵalysy qauípsízdígí kúsheıedí jáne jergílíktí árí tranzıttík kólík úshín qolaıly jaǵdaı qalyptasady.
Būl joba halyqaralyq jol jelísín keshendí jańǵyrtu jūmystarynyń kezektí kezeńí árí Qazaqstandaǵy eń írí qalalyq aglomeratsıyanyń kólík ınfraqūrylymyn damytuǵa qosylǵan mańyzdy úles bolmaq.