Qazaqstandyq boksshy Nurbek Mursal Úndistannyń Delı qalasynda ótken World Boxing uıymynyń Álem kýbogynyń fınaldyq kezeńinde kúmis júldege ıe boldy, - dep habarlaıdy Aqshamnews.kz tilshisi.
Nurbek Mursal 70 kelige deıingi salmaq dárejesinde fınalǵa deıin jetken. Sheshýshi jekpe-jekte ol úndistandyq Hıteshke qarsy shyqty. Úsh raýnd qorytyndysy boıynsha tóreshiler jeńisti qarsylasyna berip, qazaqstandyq boksshy týrnırdi kúmis medalmen aıaqtady.
Sondaı-aq Qazaqstan quramasy Delı tórinde taǵy bir altyn júlde enshiledi. 85 kelige deıingi salmaqta óner kórsetken Sultanbek Aıbaruly fınalda Ózbekstan boksshysy Jasýrbek Iýldoshevten basym túsip, el qorjynyna “altyn” saldy.
Aıta keteıik, Delı qalasyndaǵy fınaldyq kezeńde Qazaqstan quramasy bir altyn, bir kúmis jáne birneshe qola medal jeńip alyp, maýsymdy júldemen túıindedi.