Walt Disney-diń jáne «Masha men aıý» jobasynyń mamandary qazaq anımatorlaryna dáris oqıdy
Álemge tanymal múltfılmderdiń jaryq kórýine tikeleı atsalysqan mamandar Túrkistanda ótetin halyqaralyq ÁMEN anımasıalyq fılmder kınofestıvalinde arnaıy dáris oqyp, trenıńter ótkizedi, dep habarlaıdy almaty-akshamy.kz QazAqparat saıtyna silteme jasap.
«Óz qyzmetin «Soıýzmýltfılm» stýdıasynan bastap, amerıkalyq World Disney stýdıasynda shyńdalǵan sýretshi-anımator Aleksandr Dorogov festıvál qatysýshylaryna ıdeıadan bastap, anımasıalyq fılmdi beıneleýge deıingi prosesti baıandap, basty keıipkerdi izdeýdiń qyr-syryn túsindiredi. «Qap, bálem, tura tur!» (Ný, pogodı), «Mýlan», «Arystan patsha» (The Lion King), «Fıksıkter», «Lılo men Stıch» (Lilo & Stitch) ekildi álemge tanymal jobalarǵa qatysqan mamannyń dárisi onlaın ótedi. Al brıtan sarapshysy, «Zontul films limited» anımasıalyq kompanıasynyń dırektory, profesor, jazýshy Tım Ýılson onlaın dárisinde batys anımasıa salasynyń erekshelikterine toqtalyp, jeke tájirıbesin ortaǵa salady», - dep habarlady kınofestıval uıymdastyrýshylary.
Taǵy bir aǵylshyn mamany qatysýshylarǵa derekti fılm túsirýde anımasıa elementterin qoldanýdyń utymdylyǵy jaıly aıtyp beredi. Kınorejısser, jazýshy jáne sýretshi Olıver Gaı-Ýotkıns túsirgen derekti fılmder álemge tanymal kınofestıvalderdiń júldegeri atanǵan. Jazýshylyq qyrynan tanylǵan Ýotkınstiń kórkemsýret týyndylary da kórmelerge jıi qoıylady.
Qonaqtar qatarynda kúlli álem balalaryna erekshe tanymal «Masha men aıý» jobasynyń rejıseri Natalá Malgına bar. Reseılik maman onlaın dáris barysynda 40-tan astam tilge aýdarylǵan «Masha men aıý» týyndysynyń jasalý barysyna toqtalady.
«Túrkistanǵa arnaıy kelgen Túrkıa anımasıa salasynyń úzdikteri Mýsab Gúndúz ben Mustafa Ahmet Qara festıvál qatysýshylarymen tildesip, tájirıbelerimen bólisedi. Anımasıa rejıseri, komıks jáne qozǵalys sýretshisi Mustafa Ahmet Qara komıks jasaýdyń qyr-syryna toqtalsa, Cordoba anımasıa stýdıasynyń negizin qalaýshy Mýsab Gúndúz aýdıtorıanyń jas ereksheligine qaraı joba jasaýdyń negizderin tanystyrdy», - deıdi uıymdastyrýshylar.
Sondaı-aq, festıvál qonaqtary Qazaqstannyń úzdik anımasıalyq kınostýdıalarynyń kórmesin tamashalap, anımasıa jasaýdyń erekshelikterimen tanysady.