Qazaqstanda bílím beru júıesíne jasandy ıntellekt qūraldaryn engízu jóníndegí ūlttyq joba bastau aldy. Bastama OpenAI kompanıyasymen bírlesíp ūıymdastyrylyp otyr. Onyń ayasynda 165 myń pedagog bílím beru maqsattaryna arnaıy ázírlengen ChatGPT-díń nūsqasy — ChatGPT Edu júıesíne qol jetkíze alady. Jobanyń demeushísí — Freedom Holding Corp., al tehnologıyalyq ıntegratsıya boıynsha seríktesí — Bilim Group IT holdıngí.
Bilim Group baspasóz qyzmetíníń habarlauynsha, Freedom Holding Corp. OpenAI kompanıyasymen jasalǵan kelísímshart ayasynda qazaqstandyq pedagogter úshín ChatGPT Edu-díń bír jylǵa arnalǵan 165 myń lıtsenzıyasyn satyp alǵan. Osy arqyly joba bílím beru salasyna jasandy ıntellekttí engízu boıynsha memlekettík deńgeıde qoldau tapqan álemdegí eń írí bastamalardyń bíríne aınalyp otyr.
«JI negízíndegí ozyq tehnologıyalardyń kómegímen ár adamnyń áleuetín arttyruda bílím salasynyń atqaratyn rólí orasan. Qazaqstan men OpenAI arasyndaǵy seríktestík memlekettíń pedagogterge paıdaly qūraldar ūsynyp, praktıkalyq qoldau men oquǵa degen qoljetímdílíktí arttyru arqyly JI mashyqtaryn meńgerudegí alshaqtyqty qalaı eńsere alatynyn kórsettí. Mūndaı qadam búkíl bílím beru júıesíníń bolashaǵyna ūzaqmerzímdí yqpal etuge kómektesedí», — deıdí OpenAI ókílí Kevın Mılls.
ChatGPT Edu lıtsenzıyalary bílím beru júıesíníń barlyq deńgeıínde, atap aıtqanda, mektepke deıíngí ūıymdar, mektepter, kolledjder men joǵary oqu oryndarynyń, sondaı-aq ǵylymı-zertteu ınstıtuttary men Astana Hub arasynda taratylady. Joba Jasandy ıntellekt jáne tsıfrlyq damu mınıstrlígí, Oqu-aǵartu mınıstrlígí jáne Ǵylym jáne joǵary bílím mınıstrlíkteríníń qatysuymen júzege asyp otyr. Jobaǵa qatysushylar úshín lıtsenzıyalar tegín ūsynylady, al olardy íske qosu otandyq BilimClass platformasy negízínde ázírlengen ai.bilimclass.kz arnaıy servısí arqyly júrgízíledí.
«ChatGPT Edu – tek tehnologıyalyq qūral emes, Qazaqstannyń adamı kapıtalyna salynǵan ınvestıtsıya. Jobanyń negízgí maqsaty — qazaqstandyq pedagogterge JI múmkíndíkterín meńgeruge jáne ony kúndelíktí jūmysta tıímdí paıdalanuǵa jaǵdaı jasau. Tehnologıya pedagogterdíń júktemesín azaıtyp, bílím sapasyn arttyruǵa jáne kásíbı deńgeıín shyńdauǵa septígín tıgízedí. Bíz ūstazdarǵa eń mańyzdy íske — bílím alushylarmen jūmysqa kóbírek uaqyt bóluge múmkíndík beretín tıímdí qūral ūsynyp otyrmyz», — dep atap óttí Bilim Group IT-holdıngíníń bas dırektory Aleksandr Savchenko.
ChatGPT Edu — bílím beru mekemelerí úshín arnaıy ázírlengen ChatGPT nūsqasy. Būl júıe oqu oryndaryna jasandy ıntellekttíń ozyq múmkíndíkterín paıdalanuǵa jol ashady. Sonymen qatar derekterdíń qauípsízdígí men qūpıyalyǵyn saqtap, jūmysty tıímdí basqaruǵa múmkíndík beredí.
ChatGPT Edu kómegímen pedagogter sabaq josparyn ázírlep, tapsyrmalar men test sūraqtaryn daıyndauǵa, sonymen qatar oqu materıaldaryn ár bílím alushynyń deńgeıí men qajettílígíne qaraı beıímdeuge múmkíndík alady. Joba nátıjesínde pedagogterdíń sabaqqa daıyndaluǵa, tapsyrmalardy tekseruge, esep beruge jáne basqa da bírízdí jūmysqa ketetín uaqyty edáuír qysqarmaq.