QR Mádenıet jáne aqparat mınıstrlígí Ūly Otan soǵysyna qatysqan qazaqstandyq maıdangerlerdí eske alu maqsatynda «Batyrlarǵa taǵzym» (https://batyrlarga-tagzym.kz/ru/) atty bíregeı onlaın-portalyn íske qosty.
Jobanyń maqsaty – Ūly Jeńíske ólsheusíz úles qosqan qazaqstandyqtardyń erlígí men jankeshtílígí turaly bolashaq ūrpaqqa qūndy aqparattardy jetkízu, dep habarlaıdy aqshamnews.kz.
Portalda keń kólemdí málímetter bazasy bar. Saıtta qazírdíń ózínde 677 myńnan astam soǵys ardagerí, onyń íshínde 365 Keńes odaǵynyń batyry, 4 ekí márte Keńes odaǵynyń batyry jáne 19 «Dańq» ordeníníń kavalerí turaly aqparat jınaqtalǵan. Interfeıs qajettí aqparatty tabuǵa ǵana emes, sonymen qatar óz ardager tuystary turaly derekterdí qosuǵa, jańalyqtarmen tanysuǵa múmkíndík beredí. Osylaısha, būl portal tarıhty bolashaq ūrpaq úshín saqtap, batyrlarǵa taǵzym etíp, qūrmet kórsetuge arnalǵan platforma qyzmetín atqarady.
Onlaın-portaldy paıdalanushylar:
- saıtqa óz tuysynyń tarıhyn qosa alady: ár adamnyń soǵysqa qatysqan jaqyndary turaly estelíkterín bólísuge múmkíndígí bar.
- fotosuretterdí júkteı alady: ár qoldanushy ardager tuysynyń suretterín veb-portalǵa júktep, onyń jarqyn beınesín máńgílíkke amanat etuge múmkíndígí bar.
- ardagerlerdíń jańa málímetterín qosa alady: veb-portaldyń derekqorynda joq ardagerlerdíń málímetterín ońaı engízuge bolady.
- batyrlar galereyasyn kóre alady: saıtta qazírdíń ózínde kóptegen batyrlardyń ómírbayandary jazylǵan galereya bar, kez kelgen qoldanushy būl bólímnen olardyń ómírí men jasaǵan erlíkterí turaly kóbírek aqparat alady.
- jańalyqtar únemí jańaryp otyrady: veb-portalda ardagerlerge jáne jobaǵa qatysty jańalyqtar men oqıǵalar tūraqty túrde jarıyalanyp tūrady.
Aıta keteıík, Jeńístíń 80 jyldyǵyna oraı respublıka boıynsha 200-den astam ís-shara ūıymdastyrylady.