Armıa kez kelgen mindetti oryndaýǵa qabiletti bolýy tıis.
Qazaq armıasyna jańa talaptar qoıylyp jatyr. Áskerge qoıylatyn jańa talaptar týraly Qorǵanys mınıstri Nurlan Ermekbaev atalmysh vedomstvoda ótken aparattyq keńeste aıtty, dep habarlaıdy Almaty-akshamy.kz.
«Qorǵanys mınıstrliginde bolyp ótken kezekti aparattyq keńeste beıbit ýaqytta halyqtyń ómiri men densaýlyǵyn qorǵaý, tótenshe jaǵdaılardy joıýǵa qoldaý kórsetý úshin qoldanylýy múmkin kúshter men quraldardy jetildirý boıynsha mindetter qoıyldy», – delingen Qorǵanys mınıstrliginiń baspasóz qyzmetiniń habarlamasynda.
Pandemıa kezeńinde «qos maqsattaǵy komponentterdiń» óte qajet ekeni is júzinde dáleldendi. Álemde oryn alǵan sońǵy oqıǵalar – órt shyǵý, sý basý, tabıǵı zilzala aıasynda olardyń ózekti bolyp tabylatyny rastaldy.
Mamandandyrylǵan áskerı-dalalyq, onyń ishinde ınfeksıalyq beıindegi medısınalyq mekemelerdiń múmkindigin keńeıtý tapsyryldy.
Órt sóndirýge arnalǵan múmkindikterdi jetildirip, olardy kóbeıtýge tapsyrmalar berildi.
Áskerı-teńiz kúshteri udaıy júzý quraldaryn, sonymen qatar radıolokasıalyq jabdyqty tartý arqyly izdeý-qutqarý jumystaryna qatysýdy is júzinde pysyqtaýy tıis.
Sonymen qatar, brondy tank tehnıkasyn qysqy ýaqytta qar tazalaý jumysynda qoldaný jáne ol úshin jóndeýmen aınalysatyn áskerı bólimder, sehtar, bólimsheler kúshterimen arnaıy jabdyq jasaý máselesin pysyqtaýǵa nusqaý berildi.
«Armıa árqashan kez kelgen qıyndyqty eńserýge, kez kelgen mindetti oryndaýǵa qabiletti bolýy tıis», – dedi Qorǵanys mınıstri.