Urlanǵan 1 134 mal zańdy ıelerine qaıtaryldy.
İshki ister mınıstrligi jyl basynan beri 190-ǵa jýyq mal urysy ustalǵany týraly málimdedi, dep habarlaıdy aqshamnews.kz Polisia.kz saıtyna silteme jasap.
Sońǵy bes jylda Qazaqstanda mal urlyǵynyń sany 64%-ǵa azaıdy. Almaty oblysynda krımınaldyq polısıa qyzmetkerleri jaıylymda júrgen iri qara maldy urlaǵan úsh adamnan quralǵan qylmystyq topty ustady. Búginde atalǵan toptyń jergilikti turǵyndarǵa tıesili 30-dan astam sıyrdy urlaǵany dáleldendi. Belgili bolǵandaı, ustalǵandardyń biri Volkswagen júk kóliginiń júrgizýshisi bolyp jumys istegen. Kúdiktiler ár eki-úsh kún saıyn mal urlap, ony soıyp, etin Almaty qalasynyń bazarlarynda satqan.
Pavlodar oblysynda da polısıa qyzmetkerleri úsh adamnan turatyn qylmystyq topty ustady. Olar 2023 jylǵy jeltoqsannan bastap búginge deıin Ekibastuz aýdany aýmaǵynda jylqylardy urlaǵan. Tergeý barysynda kúdiktilerdiń biri aýyl sharýashylyǵy seriktestiginde jylqyshy bolyp jumys istep, sońǵy eki jyl ishinde 70-ten astam jylqyny urlaǵany anyqtaldy.
Mal urlyǵymen kúres – polısıa qyzmetiniń basym baǵyttarynyń biri. Qabyldanǵan sharalardyń nátıjesinde, sońǵy bes jylda mal urlyǵy qylmystarynyń sany 64%-ǵa azaıǵan. Jyl basynan beri 188 mal urlyǵy faktisi boıynsha qylmyskerler ustalyp, 41 qylmystyq toptyń áreketi toqtatyldy. Urlanǵan 1 134 mal basy zańdy ıelerine qaıtaryldy.
İshki ister mınıstrligi qarapaıym qaýipsizdik erejelerin saqtaýdy usynady:
qoralardy bekitip, maldy qaraýsyz qaldyrmaý kerek;
asyltuqymdy maldy baqylaýǵa alý maqsatynda GPS-trekerlerdi ornatý sıaqty zamanaýı tásilderdi keńinen qoldaný qajet;
maldy únemi esepke alyp otyrý, chıpteý, syrǵalaý jáne en salý kerek.