Abaı unıversıtetínde qazaq tíl bílímíníń kórnektí ókílí, fılologıya ǵylymdarynyń doktory, QR ŪǴA akademıgí Ómírzaq Aıtbaevtyń 90 jyldyǵyna arnalǵan «Ǵylymdy damytudaǵy qoǵamdyq ūıymdardyń rólí» atty ǵylymı-praktıkalyq dóńgelek ústel óttí. Taǵylymdy ís-shara Halyqaralyq qazaq tílí qoǵamy jáne Fılologıya ǵylymdary zertteulerín saraptamalyq úılestíru ortalyǵymen bírlesíp ūıymdastyryldy. Kelelí jıynǵa unıversıtet basshylyǵy, elímízge belgílí ǵalymdar jáne tíl janashyrlary men akademıktíń tuystaryqatysty, – dep habarlaıdy aqshamnews.kz tílshísí.
Ómírzaq Aıtbaev – sanaly ǵūmyryn qazaq tíl bílímín órkendetuge, memlekettík tíldíń qoǵamnyń barlyq salasynda ornyǵuyna arnaǵan tūlǵa.Ǵalymnyń zertteulerí otandyq lıngvıstıkanyń, sonyń íshínde termınologıya salasynyń qalyptasuy men damuyna zor yqpal ettí. Akademık būl baǵyttyń bastauynda tūrǵan Ahmet Baıtūrsynūly dástúrín jalǵap, jańa deńgeıge kóterdí. Ómírzaq Aıtbaev sanaly ǵūmyrynda 500-den astam ǵylymı eńbek, 20-dan astam monografıya men oqu qūraldaryn shyǵardy.
Alqaly jıyndy Fılologıya ǵylymdary zertteulerín saraptamalyq úılestíru ortalyǵynyń prezıdentí, akademık Kárímbek Qūrmanálıevtíń moderator retínde júrgízíp, qaıratkerdíń qoǵamdyq jáne ǵylymı qyzmetín bayandady. Dóńgelek ústeldí kíríspe sózben ashqan Abaı atyndaǵy QazŪPU-dyń Basqarma Tóraǵasy-Rektory Bolat Tílepmereıtoıdyń mán-mańyzyna toqtalyp, ony ǵylym onkúndígí ayasynda ótkízudíń aıryqsha sıpaty bar ekenín aıtty.
– Ómírzaq Aıtbaevtyń 90 jyldyǵy ǵylym dekadasymen tūspa-tūs keluíníń sımvolıkalyq mání bar. Óıtkení ǵylym – qoǵam damuynyń negízgí qozǵaushy kúshí. Al ǵylymnyń ílgeríleuí tek ǵalymdardyń eńbegíne ǵana emes, qoǵamdyq ınstıtuttardyń qoldauyna da tíkeleı baılanysty. Osy tūrǵydan alǵanda, elímízde tíl ǵylymynyń damuyna aıryqsha úles qosqan qūrylymdardyń bírí – Halyqaralyq qazaq tílí qoǵamy. Onyń qalyptasuyna Ábduálı Qaıdar, Rabıǵa Syzdyq, Shora Sarybaev, Myrzataı Joldasbekov jáne Ómírzaq Aıtbaev syndy tūlǵalar ólsheusíz eńbek síńírdí, – dedí rektor.
Jıyn barysynda ǵylymı qauymdastyq ókílderí akademıktíń tíl sayasaty, termınologıya jáne qazaq tílín ǵylym tílí retínde damytu baǵytyndaǵy eńbekterín jan-jaqty talqylady. QR ŪǴA akademıgí Erden Qajybek ǵalymnyń ǵylymı ūstanymdary men tūlǵalyq bolmysyna toqtalyp, qazaq termınologıyasyn júıeleudegí tarıhı rólín aıryqsha atady. Fılologıya ǵylymdarynyń doktory, professor Qalbıke Esenova qazírgí qazaq tílíníń damu úderísterín saralap, akademık eńbekteríníń búgíngí tsıfrlandyru dáuírímen sabaqtastyǵyn ǵylymı tūrǵyda negízdedí.
Sonymen qatar Anar Fazyljan, Anar Salqynbaı, Jańalyq Baltabaeva syndy ǵalymdar qazaq tílíníń ózektí máselelerí boıynsha píkír bíldíríp, qoǵamdyq ūıymdardyń ǵylymı úderísterdí úılestírudegí mańyzyna, halyqaralyq yntymaqtastyqty keńeıtuge qatysty ūsynystaryn ortaǵa saldy. Almaty qalasyndaǵy tíl sayasatyn júzege asyru tájírıbesí jónínde Baqyt Qalymbet bayandama jasap, óńírlík jobalardyń tıímdí tūstaryn atap óttí.
Basqosu sońynda qatysushylar ǵylym men qoǵam baılanysyn nyǵaıtu, ǵylymı zertteulerdíń sapasyn arttyru jáne memlekettík tíldíń mártebesín kóteru baǵytyndaǵy bastamalardy júıelí jalǵastyru qajettígín basa aıtty.Taǵylymdy kezdesu mereıtoılyq sıpatpen shektelmeı, qazaq tílíníń ǵylym keńístígíndegí orny men bolashaǵyna qatysty mańyzdy oılar toǵysqan mazmūndy píkír alańyna aınaldy.