Mıǵraj sózdikte «joǵary kóterilý» degendi bildiredi, sharıǵattaǵy maǵynasy «Muhammed (s.ǵ.s.) Isra túni Báıtýl-maqdısten Eń Joǵarǵy aspanǵa kóterilýi». Iaǵnı Alla Taǵala Paıǵambarymyzdy (s.ǵ.s.) Erejep aıynyń 26-nan 27-ne qaraǵan túni Mekke qalasynan Aqsa meshitine aparyp, sol jerden mıǵrajǵa kóterdi. Isra súresinde: «Pendesin bir túni oǵan belgilerimizdi kórsetý úshin Haram meshitinen biz aınalasyn múbárák qylǵan Aqsa meshitine (ısra jasatyp) aparǵan Alla Taǵala ár túrli kemshilikten pák», – delingen. Aıatta kelgen «Isra» sózi túnde júrý degendi bildiredi.
Alla elshisiniń jubaıy Hadısha anamyz ben kókesi Ábý Talıb qaıtys bolyp, Taıyp saparynan qatty soqqy alǵan t.b. oqıǵalardan keıin Eki dúnıe sardaryna jubatý ispettes Mıǵraj oqıǵasy oryn alǵan edi. Bul oqıǵa múminderdiń ımanyn qýattasa, ımany álsiz nemese kúpir senimdegilerdiń kúpirligin arttyrdy. Ábý Bákir syndy sahabalar osy oqıǵadan soń «Syddyq», ıaǵnı «Rastaýshy» atandy. Mysaly emtıhan ne olımpıada ótkende bilimdi shákirt ne sportshy óz sheberligin anyq kórsetetini sıaqty aqıqat oryn aldy.
Mıǵraj túnin qalaı ótkizý kerek?
Qazaqstan musylmandary dinı basqarmasynyń málimetinshe, bıyl Mıǵraj túni 15 qańtardan 16 qańtarǵa qaraǵan túnge sáıkes keledi. Bul túni Paıǵambar Muhammedke (s.ǵ.s.) Alla Taǵala tarapynan úlken nyǵmetter berilgen.
Mıǵraj túniniń artyqshylyqtary
Mıǵraj túni Paıǵambarymyzǵa (s.ǵ.s.) mynadaı úsh úlken syı jasaldy:
Bes ýaqyt namaz paryz etildi;
«Baqara» súresiniń sońǵy eki aıaty – «Ámánár-rasýlý» ýahı etildi;
Alla Taǵalaǵa eshbir serik qospaı, úlken kúná jasamaǵan úmbetke keshirim beriletini súıinshilendi.
Osy sebepti Mıǵraj túni – táýbe jasap, rýhanı tazarýǵa, ımandy kúsheıtýge berilgen erekshe múmkindik.
Mıǵraj túninde jasalatyn saýapty amaldar
QMDB málimetinshe, bul túndi qulshylyqpen ótkizý – mustahab (usynylǵan amal). Sondaı-aq Mıǵraj túnin qulshylyqpen ótkizgisi kelgen jandarǵa tómendegi amaldardy usynady:
Namaz oqý (qaza namazdary, nápil jáne táhájjýd namazdary);
Quran oqý, ásirese «Baqara» súresiniń sońǵy eki aıatyn oqý;
Alla Taǵaladan ózi, barsha musylman úmbeti, ata-anasy men jaqyndary, bala-shaǵasy úshin keshirim surap, duǵa jasaý.