Jyl basynan berí respublıkalyq byudjetten 3 trln 512,7 mlrd teńge somasyna zeınetaqy tólendí,- dep habarlaıdy aqshamnews.kz.
Onyń íshínde bazalyq zeınetaqy tóleuge – 1 trln 137,2 mlrd teńge, yntymaqty zeınetaqy tóleuge – 2 trln 375,5 mlrd teńge qarastyryldy.
2025 jylǵy 1 qarashadaǵy jaǵdaı boıynsha zeınetkerler sany – 2 mln 516 myń adam.
2025 jylǵy 1 qarashadaǵy jaǵdaı boıynsha jıyntyq zeınetaqynyń ortasha mólsherí 142 744 teńgení qūrady, onyń íshínde yntymaqty zeınetaqy mólsherí – 95 167 teńge, bazalyq zeınetaqy – 47 577 teńge.
Būdan būryn habarlanǵandaı, 2025 jylǵy 1 qańtarda bazalyq zeınetaqy tólemíníń mólsherí QR Ūlttyq Bankí aıqyndaıtyn ınflyatsıyanyń boljamdy deńgeıíne sáıkes 6,5%-ǵa, yntymaqty zeınetaqy 8,5%-ǵa, yaǵnı ınflyatsıya deńgeıínen 2% - ǵa oza otyryp ūlǵaıtyldy.
Būdan basqa Memleket basshysynyń tapsyrmasy boıynsha 2023 jyldan bastap bes jyl íshínde eń tómen bazalyq zeınetaqyny eń tómen kúnkórís deńgeıíníń 70%-na deıín, eń joǵary – 120%-ǵa deıín jyl saıyn kezeń-kezeńímen arttyru júzege asyrylady.
Máselen, 2025 jylǵy 1 qańtardan bastap bazalyq zeınetaqynyń eń tómen mólsherí eń tómen kúnkórís deńgeıíníń 65%-nan 70%-ǵa deıín ūlǵaıtyldy, būl 32 360 teńgení qūrap, onyń eń joǵary mólsherí eń tómen kúnkórís deńgeıínen 105-ten 110%-ǵa deıín arttyrylyp, 50 851 teńgení qūraıdy.
2018 jylǵy 1 shíldeden bastap memlekettík bazalyq zeınetaqy tólemí zeınetaqy júıesíndegí ótílín eskere otyryp, ár alushyǵa jeke taǵaıyndalatynyn eske salamyz.
Būl rette 1998 jylǵy 1 qańtardaǵy jaǵdaı boıynsha yntymaqty júıede jūmys ístegen uaqyty, sondaı-aq míndettí zeınetaqy jarnalary (būdan árí – MZJ) tólengen kezeńder zeınetaqy júıesíndegí eńbek ótílíne qosylady.
Eger azamattyń zeınetaqy júıesíndegí ótílí 10 jyl nemese odan az bolsa, sondaı-aq múlde joq bolsa, bazalyq zeınetaqy eń tómengí kúnkórís deńgeıíníń 70%-na teń bolsa, sodan keıín 10 jyldan asqan ár jyl úshín onyń mólsherí 2 %-ǵa artady. Al eger sízdíń ótílíńíz 20 jyl bolsa, bazalyq zeınetaqy tómengí kúnkórís deńgeıíníń 90 %-yn qūraıdy. Eńbek ótílí 30 jyl nemese odan kóp bolsa, kúnkórís deńgeıíníń eń joǵarǵy mólsherínde yaǵnı 110% belgílenedí.
Eger bír aı íshínde míndettí zeınetaqy jarnalary Bíryńǵaı jınaqtaushy zeınetaqy qoryna bírneshe ret audarylsa, jınaqtaushy júıege qatysu merzímí bír aıdy qūraıdy.
Osylaısha míndettí zeınetaqy jarnalary neǵūrlym tūraqty jáne tolyq kólemde audarylatyn bolsa, zeınet jasyna jetkende bazalyq zeınetaqy tólemderíníń mólsherí soǵūrlym kóp bolady.
Óz kezegínde azamattyń jasyna baılanysty zeınetaqy tólemderíníń mólsherí 1998 jylǵy 1 qańtardaǵy jūmys ótílíne (kem degende 6 aı qajet) jáne zeınetkerlíkke deıíngí kezeńdegí ortasha aılyq tabysyna baılanysty bolady.