Senator Bıbıgúl Jeksenbaı óziniń depýtattyq saýalynda janýarlardan alynatyn ónimderdiń sapasy men qaýipsizdigi máseleleri týraly aıtyp berdi. Bul sala elimizdiń azyq-túlik qaýipsizdigi júıesindegi eń osal býyn bolyp otyr.
Depýtattyń aıtýynsha, agroónerkásip keshenine ınvestısıanyń ósýi jáne salanyń oń kórsetkishine qaramastan, turaqtylyqtyń negizgi belgisi – azyq-túlik qaýipsizdigi jurtshylyqty mazalap otyr. Memleket agrarlyq salany qarqyndy túrde kótermelep otyrǵan jaǵdaıda, mal sharýashylyǵy ónimderiniń sapasy men qaýipsizdigin baqylaý máselelerin sheshýge salǵyrttyq tanytý – halyqty sapaly ónimmen qamtamasyz etý men elimizdiń azyq-túlik saıasatyna degen senimge nuqsan keltirýi múmkin.
«Veterınarıalyq baqylaýdyń álsizdigi, tekseristerdiń turaqsyzdyǵy, zerthanalyq qýattyń jetkiliksizdigi, jem-shópke qoıylatyn normatıvterdiń jáne jem-shóp bazasyn baqylaýdyń bolmaýy, sondaı-aq ruqsat etiletin shekti deńgeılerdiń rettelmeýi, antımıkrobtyq rezıstenttilik deńgeıiniń artýy – álsiz monıtorıńtiń saldarynan kúsheıip otyrǵan jahandyq qaýip. Importtalatyn mal sharýashylyǵy ónimderinde janýarlardyń ósý gormondary, stımýlátorlar jáne ózge de tyıym salynǵan nemese qolaısyz qospalar qosylǵan jemmen qorektengen qaýpi bar. Osyǵan baılanysty bul kórsetkishke erekshe kóńil bólý qajet, sebebi dál tańbalaý halyqtyń ónimniń paıdalyǵy nemese zıandylyǵy týraly habardarlyǵyn qalyptastyrady», - dep atap ótti Bıbıgúl Jeksenbaı.
Senator sondaı-aq halyqaralyq tájirıbe, ásirese EO, EYDU elderi men BUU qurylymdarynda ósý gormondaryna tyıym salý jáne antıbıotıkterdi profılaktıkalyq qoldanýdan bastap zerthanalardy mindetti akredıtteýge, ashyq monıtorıńke jáne «mal azyǵy – ónim» qadaǵalaý júıesine deıin janýardan alynatyn ónimder sapasyn qatań baqylaýǵa alýǵa negizdelgenin atap ótti. Damyǵan elderde ashyq esep, qaldyq zattardyń qatań normatıvteri jáne tańbalaýdyń sıfrlyq júıeleri qoldanylady.
«Joǵaryda baıandalǵandardy eskere otyryp, aýyl sharýashylyǵy ónimderiniń sapasyn qamtamasyz etýde standarttaryna barynsha sáıkestendirý jáne jem-shópke arnalǵan normatıvterdi jetildirip, memlekettik standarttar men tehnıkalyq reglamentterdi engizý kerek. Ónimderdiń sertıfıkattalýy jáne zerthanalyq zertteýlerden ótýi boıynsha ashyq qoljetimdiligi bar ulttyq derekter bazasyn quryp, monıtorıń júrgizý kerek. Halyq densaýlyǵyna zıan keltirgen jaǵdaılarda ákimshilik jáne qylmystyq jaýapkershilikti kúsheıtip, klasterlik sheshimder arqyly organıkalyq qospalar óndirisin damytý jáne antıbıotıkter men gormondardyń qaýipteri týraly halyqty aqparattandyrý jónindegi jalpyulttyq kampanıa júrgizý kerek», - dedi Bıbıgúl Jeksenbaı.