Budan buryn Qaraǵandy oblysyndaǵy «Abaı» shahtasynda bolǵan metan gazynyń jarylýy saldarynan 6 kenshiniń qaza tapqanyn habarlaǵanbyz.
QMDB Tóraǵasy, Bas múftı Naýryzbaı qajy Taǵanuly Qaraǵandy oblysynyń «Abaı» shahtasyndaǵy jarylystan qaza tapqan shahterlerdiń jaqyndary men týystaryna kóńil aıtty, dep habarlaıdy Almaty-akshamy.kz Muftyat.kz saıtyna silteme jasap.
«Qaraǵandy oblysyndaǵy bolǵan qaıǵyly jaǵdaıdy aýyr qabyldadym. «Abaı» shahtasynda bolǵan metan gazynyń jarylýy saldarynan qanshama otbasy qara jamyldy. Jarylys saldarynan qarapaıym jumysshylar – shahterler qaza tapty. Ózimniń jáne Qazaqstan musylmandary dinı basqarmasy atynan jarylystan dúnıe salǵan azamattardyń týǵan-týystary men jaqyndaryna qaıǵylaryna ortaqtasyp, kóńil aıtamyn. Sondaı-aq jarylystan zardap shekken, jaraqat alǵan azamattardyń tezirek saýyǵyp ketýin tileımin. Jaratqan jar bolsyn!» delingen jedelhatta.
Aıta keteıik, 7 qarasha kúni tańda «Abaı» shahtasynda metan gazy jaryldy. Bul ýaqytta shahtada 64 adam jumys istep jatqan. Onyń 54-i evakýasıalandy. Apat saldarynan 6 kenshi qaza taýyp, 2 adam aýyr jaraqat aldy.