Batyrdyń kítap oquǵa áuestenuíne otbasy da áser etken, dep habarlaıdy aqshamnews.kz tílshísí.
Elordadaǵy Y. Altynsarın atyndaǵy №83 mektep-gımnazıyanyń 11-synyp oqushysy Batyr Baltabekov úsh jylda 800-den astam kítap oqyǵan. Osy uaqyt íshínde ol qazaq jáne shetel klassıkteríníń shyǵarmalaryn oqyp, ádebı mūramen tanysty. Qazír ózí de qalam terbep, shyǵarmashylyqqa den qoıyp júr. Kítap oqudy oqushy eń súıíktí ísíníń bírí sanaıdy.
Batyrdyń súıíktí avtorlarynyń qatarynda Mūhtar Áuezov, Abaı jáne Mūqaǵalı Maqataev bar. Ol qazaq jáne orys tílderínde kítap oqyǵandy ūnatady. Sondyqtan ádebı tanymy otandyq jazushylardyń shyǵarmalarymen ǵana shektelmeıdí.
Oqushy kítap oquǵa degen súıíspenshílígín dostaryna da darytuǵa tyrysady. Ol bírden kítap ūsynbaı, aldymen olardyń qandaı taqyryptar men janrlarǵa qyzyǵatynyn anyqtaıdy. Sodan keıín árqaısysynyń talǵamyna saı shyǵarma tańdap beredí. Onyń aıtuynsha, eń bastysy – adamnyń kítap oquǵa degen qyzyǵushylyǵyn oyatatyn tuyndyny tabuǵa kómektesu.
Batyrdyń kítap oquǵa áuestenuíne otbasy da áser etken. Ol úıde oqyǵan shyǵarmalaryn ádebıetke jaqyn ájesímen jıí talqylaıdy. Mekteptí ayaqtaǵan soń Batyr tarıh mamandyǵyn tańdap, bolashaqta mūǵalím boludy kózdeıdí.
Ol «Kítap oqıtyn ūlt» respublıkalyq marafonyna da qatysyp júr. Qorytyndy emtıhandarǵa daıyndalsa da, jobaǵa uaqyt tabuǵa tyrysady. Osy uaqytqa deıín marafon ayasynda bes-alty kítap oqyp, árqaısysy turaly óz píkírín jarıyalaǵan.
Mektepte de onyń kítapqa degen qyzyǵushylyǵyna qoldau kórsetíledí. Batyrmen segízínshí synyptan berí jūmys ístep kele jatqan synyp jetekshísí Nūrbek Shalǵynbaı oqushynyń bílímge qūshtarlyǵy men ádebıetke yqylasy erekshe ekenín aıtady.
«Batyr shaǵyn maqalalar men óleńderden bastap kólemdí romandarǵa deıín túrlí janrdaǵy shyǵarmalardy oqıdy. Onyń bílímge degen qūshtarlyǵy óte joǵary. Ádebı baıqaular men shyǵarmashylyq saıystarǵa jıí qatysyp, júldelí oryndarǵa ıe bolyp júr. Ózí de óleń jazady. Qazír onyń 100-ge juyq tuyndysy bar», – deıdí ūstazy.
Synyp jetekshísíníń sózínshe, Batyr oqyǵan shyǵarmasymen ǵana shektelmeıdí. Ol avtorlardyń shyǵarmashylyǵyna qyzyǵyp, ózge tuyndylary turaly da sūraıdy. Kítapty ayaqtaǵan soń, ūnaǵan tūstaryn talqylap, ūstazyna túrlí sūraq qoyady.
Batyr mektep kítaphanasynda da uaqytyn kóp ótkízedí. №83 mektep-gımnazıyanyń kítaphanashysy Ásıya Ábíldınanyń aıtuynsha, ol tórtínshí synyptan berí kítaphanaǵa tūraqty kelíp júr. Osy uaqyt íshínde onyń oqyrman formulyaryn ekí ret jańartuǵa tura kelgen.
«Ol – kítaphanamyzǵa jıí keletín eń belsendí oqyrmandardyń bírí. Únemí kítap alyp tūrady. Kóbíne kórkem ádebıet pen klassıkalyq shyǵarmalardy oqıdy. Ásírese Mūqaǵalı Maqataevtyń tuyndylaryn jaqsy kóredí. Onyń otbasy da kítap oquǵa qūmar. Būl balanyń ádebıetke qyzyǵushylyǵyna áser etetíní sózsíz», – deıdí Ásıya Ábíldına.
Kítaphanashynyń aıtuynsha, búgínde oqushylar ártúrlí janrdaǵy shyǵarmalardy tańdaıdy. Olardyń kóbí psıhologıya men fentezı janryna qyzyqsa, klassıkalyq ádebıettí óz betínshe tanyp-bíluge ūmtylatyndar da az emes.
«Batyrdyń mysaly bír kítapqa qyzyǵudan bastalǵan áuestík adamnyń jańa dúnıelerdí tanyp, oı elegínen ótkízuíne, keıípkerlerdíń taǵdyryna úńílíp, ózíndík kózqarasyn qalyptastyruyna jol ashatynyn kórsetedí. Meníń oıymsha, 800 kítap – onyń úlken oqyrmandyq jolyndaǵy alǵashqy beles qana», – dep qorytyndylady kítaphanashy Ásıya Ábíldına.