Aqsý qalasynda 5 jasar qyz bala ystyq sý tolǵan shuńqyrǵa qulap, kúıik jaraqatymen aýrýhanaǵa jetkizildi, dep habarlaıdy Aqshamnews.kz.
Kýágerlerdiń aıtýynsha, oqys jaǵdaı balalar oınap júrgen aýla mańynda, qubyr jarylý saldarynan paıda bolǵan shuńqyrda bolǵan.
Aqsý ákimdigi oqıǵany rastady. Qyz bala 6 qyrkúıek kúni saǵat shamamen 17:30-da Áýezov kóshesinde, dúkenderdiń biriniń janynda apatty jerge túsip ketken.
«Bala ystyq sý qubyry jarylyp, paıda bolǵan shuńqyrǵa qulaǵan. Dene men aıaqtarynyń I–III dárejeli kúıigi bar. Pavlodar oblystyq balalar aýrýhanasyna jetkizildi. Jalpy kúıik aýmaǵy – 17 paıyz», – dep málimdedi ákimdiktegiler.
Qazir búldirshinniń jaǵdaıy ortasha aýyr dep baǵalanýda. Ol travmatologıa bóliminde em qabyldap jatyr.
Qalanyń komýnaldyq qyzmetteri oqıǵaǵa qatysty ázirge túsinikteme bergen joq.