Qazaq eliniń kúmis kómeı ánshisi, QR Eńbek sińirgen qaıratkeri dúnıeden ozdy, - dep habarlaıdy Aqshamnews.kz
Sýyt habardy Dúnıejúzi Qazaqtarynyń Qaýymdastyǵy jetkizdi.
Gúlzıra Bókeıhan 1969 jyly Qytaı Halyq Respýblıkasynyń Shynjań ólkesinde dúnıege kelgen.
Ónerge bala kúninen qushtar bolǵan ol kásibı jolyn erte bastady. 1983 jyly İle oblystyq óner kolejine oqýǵa túsip, 1986 jyly atalǵan bilim ordasyn támamdady. Alǵashqy eńbek jolyn İle oblystyq Qazaq án-bı teatrynda bastady.
Keıin bilimin tereńdetý maqsatynda 1988–1993 jyldary Beıjiń Ulttyq ýnıversıtetiniń mýzyka fakúltetinde vokal mamandyǵy boıynsha bakalavr dárejesin aldy.
1999 jyly tarıhı Otanyna oralyp, Qurmanǵazy atyndaǵy Qazaq ulttyq konservatorıasynyń aspırantýrasyna qabyldandy. Munda ol KSRO halyq ártisi Roza Jamanovanyń jetekshiligimen bilim alyp, 2001 jyly oqýyn sátti aıaqtady. Osydan keıin óner ıesi Astana qalasyna jumysqa shaqyryldy.
1999 jyly Qurmanǵazy atyndaǵy Qazaq ulttyq konservatorıasyn bitirgen.
Astana memlekettik fılarmonıasynda jáne Prezıdenttik mádenıet ortalyǵynda ánshi bolǵan.
EREKSHE EŃBEGİ
Aıta keterligi, Gúlzıra Bókeıhan tarıhı Otanyna oralǵannan keıin Altaı–Tarbaǵataı óńirinde saqtalǵan kóne halyq ánderin jańǵyrtýǵa aıryqsha úles qosty. Qazirgi tańda sanaýly kásibı mamandar ǵana oryndaı alatyn bul sırek muralardy zamanaýı óńdeýden ótkizip, Qurmanǵazy atyndaǵy ulttyq aspaptar orkestri men Nurǵısa Tilendıev atyndaǵy qazaq etnografıalyq orkestriniń oryndaýynda sahnaǵa shyǵardy.
Óner ıesi osy baǵyttaǵy konserttik baǵdarlamalar arqyly ulttyq mýzykalyq qazynany keń aýdıtorıaǵa usynyp, buqaralyq aqparat quraldary arqyly halyq arasynda keńinen nasıhattady.