Almaty qalasynyń Memlekettík arhıvínde konstıtutsıyalyq reformanyń negízgí baǵyttaryn talqylauǵa arnalǵan keńeıtílgen jıyn óttí. Ís-sharaǵa megapolıste qūrylǵFan “Ádílettí jáne progressıvtí Qazaqstannyń halyqtyq Konstıtutsıyasy úshín!” jalpyūlttyq koalıtsıyasy shtabynyń múshelerí qatysty, - dep habarlaıdy Aqshamnews.kz
Tájírıbelí arhıvıster men jas mamandar qatysqan jıynda el bolashaǵy úshín mańyzdy qūjattyń, yaǵnı jańa Konstıtutsıya jobasynyń mazmūny men mán-mańyzy jónínde áńgíme órbídí. Shtab múshelerí Konstıtutsıya – memlekettíń qūqyqtyq negízín aıqyndaıtyn basty qūjat ekenín atap óttí. Jańa joba qoǵamdaǵy sayası, áleumettík jáne ekonomıkalyq ózgerísterdí eskere otyryp ázírlengenín de basa aıtty.
”Arhıv shańyraǵyna kelíp otyrǵandyqtan atap óteıín, keshegí Qasym hannyń qasqa joly, Esím hannyń eskí joly deımíz, áz-Táukeníń “Jetí jarǵysyndaǵy” erejeler deımíz, sonyń bárí qazaq halqynyń būryn da belgílí bír zańdyq qaǵıdattarǵa súıeníp ómír súrgendígín baıqatady. Qazírgí jańa Konstıtutsıya jobasynda bírínshí orynǵa adam faktory, adamı kapıtal shyǵyp otyr. Yaǵnı sízdíń otbasy músheleríńízdíń bílím aluy, densaulyǵy, áleumettík jaǵynan, zańdyq tūrǵyda qorǵaluy, bárí-bárí jeke-jeke baptarǵa, tarmaqtarmen bekítílgen. Ǵylymmen aınalysu, mádenı erkíndík deısíz be, zıyatkerlík menshíktíń shyǵarmashylyq jaǵynan qorǵaluy – osynyń barlyǵy jańa Konstıtutsıyada taıǵa tańba basqandaı jaqsy jazylǵan. Álí de uaqyt bar, ūsynys-píkírleríńíz bolsa aıtyńyzdar, bíz komıssıyaǵa jetkízuge daıynbyz. Osy kúnge deıín bízdíń memlekettík egov.kz portalyna qazaqstandyqtardan on myńnan astam ūsynys-píkír túsken eken. Būl – bízdíń halqymyzdyń sayası sauatynyń óte joǵary ekeníníń, árbír tarmaqqa, árbír bapqa jítí nazar audaryp, elímízdíń bolashaǵyna beıjaı qaramaıtynynyń belgísí”, – dedí Jalpyūlttyq koalıtsıya shtabynyń múshesí, aqyn Bauyrjan Jaqyp.
Mínberden sóz alǵan ózge spıkerler de jańa Konstıtutsıya jobasynda adam qūqyǵy men bostandyǵyn qorǵaudy kúsheıtu, memlekettík basqaru júıesín jetíldíru, azamattardyń sheshím qabyldau úderísíne qatysu múmkíndígín keńeıtu, jergílíktí ózín-ózí basqaru ınstıtuttaryn nyǵaıtu syndy mańyzdy baǵyttar qamtylǵanyn atap óttí.
”Mūndaı talqylaular eldegí demokratıyalyq úrdísterdíń aıqyn kórínísí. Konstıtutsıya jobasyn qoǵamdyq talqylauǵa shyǵaru – árbír azamattyń memleket bolashaǵyna beıjaı qaramaı, óz únín qosuyna múmkíndík beredí. Jańa Konstıtutsıya el damuynyń jańa kezeńíne jol ashatyny sózsíz. Qazírgí kezeń tez ózgeríp, jyldam damuda. Sondyqtan bíz uaqytpen ūshtasa bílíp, jahandyq úderísterden qalyp qoımauymyz kerek. 1995 jylǵy Konstıtutsıyamyzdy on ekí adam jazǵan eken. Al qazír “Konstıtutsıya nege alty aı ǵana jazylyp, tez daıyndalyp jatyr?” degen sūraqtar tuyndauda. Jańa Konstıtutsıya boıynsha júz otyz adam jūmys ístedí, yaǵnı būrynǵydan on ese kóp. Jáne būl jerdegí eń mańyzdysy – qazaqsha jazyldy”, – dedí shtab múshesí Ernūr Bıíkov.
Aıta keteıík, “Ádílettí jáne progressıvtí Qazaqstannyń halyqtyq Konstıtutsıyasy úshín!” jalpyūlttyq koalıtsıyasynyń maqsaty – halyqqa jańa Konstıtutsıyanyń baǵyt-baǵdaryn jáne bıylǵy 15 nauryzda ótetín Referendumnyń mańyzdylyǵyn túsíndíru.
