Almatyda júktemesí joǵary bírqatar qıylysta qozǵalys syzbasyn túzetu boıynsha pılottyq joba qolǵa alyndy. Joba ayasynda júrgínshíler men kólík qozǵalysyna arnalǵan jekelegen baǵdarsham fazalary ózgertíledí. Būl turaly Almaty qalasynyń Jol qozǵalysyn jáne jolaushylar kólígín ūıymdastyru basqarmasynyń ókílderí aıtty.
Ózgeríster myna qıylystarda engízíledí: Nazarbaev dańǵyly – Gogol kóshesí; Abylaı han dańǵyly – Gogol kóshesí; Dostyq dańǵyly – Abaı dańǵyly; Seıfullın dańǵyly – Maqataev kóshesí; Abaı dańǵyly – Altynsarın dańǵyly.
6 aqpanda pılottyq rejımde Nazarbaev dańǵyly men Gogol kóshesíníń, sondaı-aq Abylaı han dańǵyly men Gogol kóshesíníń qıylystarynda jańartylǵan qozǵalys syzbasy engízíldí. Qalǵan uchaskelerde osyndaı ózgerísterdí 15 aqpanǵa deıín íske asyru josparlanyp otyr.
Baǵdarsham nysandarynyń jūmysyn túzetu Almaty qalasynyń Jol qozǵalysyn jáne jolaushylar kólígín ūıymdastyru basqarmasy men Ákímshílík polıtsıya basqarmasy bírlesíp júrgízdí. Pılottyq joba ayasynda júrgínshílerdíń qauípsízdígín arttyruǵa jáne kólík qozǵalysyn jeńíldetuge baǵyttalǵan qosymsha baǵdarsham fazasy engízíldí.
Ózgeríster qozǵalysty ońtaılandyru jáne apattyq táuekeldíń qaupín azaıtu maqsatynda eń kóp júktemesí bar qıylystarda engízíledí.
Júrgízushíler men júrgínshílerge baǵdarsham sıgnaldaryn mūqıyat qadaǵalap, Qazaqstan Respublıkasynyń Jol qozǵalysy erejelerín qatań saqtau ūsynylady.