Almatynyń tauly aımaqtarynda turısterdíń qauípsízdígín qamtamasyz etu úshín keshendí ís-sharalar qolǵa alynyp jatyr, – dep habarlaıdy aqshamnews.kz tílshísí.
Būl turaly Óńírlík kommunıkatsıyalar qyzmetínde ótken brıfıngte qalalyq TJD Tótenshe jaǵdaılardy joyu basqarmasynyń basshysy Denıs Yartsev málímdedí.
Bıylǵy jazǵy mausymǵa ekí kásíbı qūtqaru bólímshesí jūmyldyrylǵan. Olardyń jalpy sany – 194 adam, 60 tehnıkasy men ekí tíkūshaq ta bar. Sonymen qatar ízdestíru-qūtqaru jūmysyna «Alpınızm federatsıyasy» men «Eríktí qūtqaru qyzmetí» ūıymdarynyń 100-den astam eríktísí tartylǵan.
Tauly aımaqtar men oǵan írgeles aumaqta 18 tau lashyǵy ornatylǵan. Olar alǵashqy medıtsınalyq kómek kórsetuge arnalǵan jıyntyqtarmen, baılanys qūraldaryn quattauǵa arnalǵan jabdyqpen, azyq-túlík qorymen qamtamasyz etílgen. Sondaı-aq tórt baqylau-qūtqaru punktí jūmys ísteıdí: Úlken Almaty shatqalyndaǵy «BAU», Kíshí Almaty shatqalyndaǵy «USP-23», sondaı-aq Butakovka shatqalyndaǵy «Medeo RSS Barys» pen «Mūztau». Onyń ekeuí byltyr paıdalanuǵa berílíp, keıbír baǵytta zardap shekkenderge kómek kórsetu uaqytyn 3–4 saǵatqa deıín qysqartuǵa múmkíndík berdí.
Turıster sanynyń artuyna baılanysty oqys oqıǵa da kóbeıíp otyr. Byltyr 410 ízdestíru-qūtqaru jūmysy júrgízílíp, 608 adam qūtqarylǵan, onyń 88-í kámeletke tolmaǵandar eken. 2026 jyldyń basynan berí 43 operatsıya júrgízílíp, 65 adam qūtqarylypty.
«Oqıǵanyń negízgí sebebí – jergílíktí jerdí bílmeu, kún raıyn elemeu, daıyndyqtyń álsízdígí men óz múmkíndígín asyra baǵalau, onyń íshínde áleumettík jelílerdegí kontenttíń áserí de bar», – dedí Denıs Yartsev.
Spıkerdíń aıtuynsha, 2025 jylǵy 9 qyrkúıekten bastap Qazaqstanda Tótenshe jaǵdaılar mınıstríníń būıryǵy kúshíne engen. Onda óte qauíptí, adam bara almaıtyn aumaqtar, su, tau sıyaqty nysandardyń tízímí bekítílgen.
«Būl qūjat turısterdí sapar aldynda tírkelíp, josparlanǵan baǵyttar turaly azamattyq qorǵau organdaryna, sonyń íshínde Almaty qalasynyń TJD-syna aldyn ala habarlauǵa míndetteıdí. Mūndaı jaǵdaıda 433.450 MGts jıílígíndegí radıostantsıyalardy paıdalanudy ūsynamyz. Būl jıílíktí gıdter men eríktí qūtqarushylar úılestíru men ózara kómek kórsetu úshín qoldanady», – dep atap óttí ol.
TJD negízgí qauípsízdík erejelerín saqtaudy eskertedí:
1. Sapardy aldyn ala josparlap alu;
2. Baǵytty, onyń qanshalyqty qıyn ekenín, daıyndyq pen jabdyqqa qoıylatyn talapty zertteu. Áleumettík jelídegí vıdeolarǵa súıeníp sapardy josparlamau;
3. Baratyn aımaqtaǵy naqty kún raıy boljamyn tekseru, qaladaǵy aua raıyna senbeu;
4. Jaqyndaryna baǵyty men qaıtar uaqytyn habarlau;
5. Senímdí gıdterdíń qyzmetín paıdalanu;
6. Jabdyqty saparǵa yńǵaılap tańdap alu;
7. Densaulyǵyna kóz júgírtíp qoyu, óıtkení bıík tauda keıbíríníń auruy asqynuy múmkín;
8. Tauǵa jalǵyz shyqpau;
9. Múmkíndík bolsa, marshrut boıynda óz ornalasqan jerín habarlap otyru;
10. Sapar aldynda «112» qyzmetí nemese TJM aumaqtyq bólímshelerí arqyly míndettí túrde tírkelu.