Qūrmanǵazy atyndaǵy Qazaq ūlttyq halyq aspaptar orkestrí Otan qorǵaushylar kúní men Jeńís kúníne oraı auqymdy kontsert ūıymdastyrdy, – dep habarlaıdy aqshamnews.kz tílshísí.
Kesh baǵdarlamasynda patrıottyq shyǵarmalar, soǵys jyldaryndaǵy ánder, erlík pen batyrlyqty, Otanǵa degen súıíspenshílíktí jyrlaıtyn tuyndylar, sondaı-aq qazaq muzyka klassıkasynyń úzdík áuenderí oryndaldy.
Kesh «Shattyq Otany» atty áıgílí kúımen ashyldy. Būl shyǵarmany 1952 jyly kompozıtor Sydyq Mūhamedjanov arnaıy osy orkestr úshín jazǵan bolatyn. Muzykanttar atalǵan kúıdí Buharestte ótken IV Dúnıejúzílík jastar men studentter festıvalínde oryndap, orkestr altyn medal jeńíp alyp, laureat atanǵan edí.
“Bíz būl shyǵarmany kópten berí oryndamaǵan edík. Onyń dál Otan qorǵaushylar kúníne arnalǵan kontsertte shyrqaluynyń ózíndík mání bar. Būl - erekshe mereke. Ol patrıotızmdí dárípteıdí jáne eldegí beıbítshílík pen kelísímdí saqtaudyń mańyzdylyǵyn nasıhattaıdy”, - dedí orkestrdíń bas dırıjerí, «Qūrmet» ordeníníń ıegerí Abylaı Tílepbergen.
Sondaı-aq būl keshte dırıjerlík tízgíndí Jeksen Aısyn men Naryn Qajyǵalı syndy óner maıtalmandary da kezektese ūstady.
Merekelík keshte orkestrmen bírge solıster de óner kórsettí. Ūzaq úzílísten keıín kontsertke Qūrmanǵazy atyndaǵy Qazaq ūlttyq konservatorıyasynyń 4-kurs studentí Jaına Bauyrjanqyzy da qatysty.
“Bíz studenttermen bírge kópten berí óner kórsetpegen edík. Sondyqtan būl erekshe oqıǵa deuge bolady. Jastarymyzdyń osyndaı daryndy ekení quantady”, - dedí Abylaı Tílepbergen.
Sonymen qatar orkestrmen bírge IL-Canto kvartetí men Aqylbek Bektasov óner kórsettí. Árbír oryndalǵan shyǵarma kórermenderdíń ystyq yqylasyna bólendí. Ónersúıer qauym artısterge ūzaq qol soqty.
Būl kontserttíń maqsaty - Otan qorǵaushylarǵa qūrmet kórsetu, ardagerlerdíń erlígín ūlyqtau ǵana emes, sonymen qatar jastardyń boıynda patrıottyq ruhty oyatu.