Almatydaǵy №200 jalpy bilim beretin mektepte polısıa qyzmetkerleri joǵary synyp oqýshylaryna arnalǵan keshendi qaýipsizdik sabaǵyn júrgizdi, - dep habarlaıdy Aqshamnews.kz.
İs-sharaǵa kıberpolısıa, uıymdasqan qylmysqa qarsy kúres basqarmasy, krımınaldyq polısıa, esirtki qylmysyna qarsy is-qımyl basqarmasy jáne ıývenaldy polısıa bólimsheleriniń mamandary qatysty. Polıseıler oqýshylarǵa jeke qaýipsizdik erejeleri, kámeletke tolmaǵandar arasyndaǵy quqyq buzýshylyqtyń aldyn alý, kıberqaýipter, keń taralǵan alaıaqtyq túrleri, sondaı-aq qaýip tóngen jaǵdaılarda durys áreket etý joldary týraly jan-jaqty túsindirdi. Internet keńistiginde qaýipsiz minez-qulyq saqtaý, jeke derekterdi qorǵaý jáne qajetti jaǵdaıda der kezinde kómekke júginýdiń mańyzyna nazar aýdaryldy.
— Jasóspirimdermen profılaktıkalyq jumys – bizdiń negizgi basym baǵyttarymyzdyń biri. Mundaı sabaqtar balalarǵa naqty táýekelderdi túsinip, kúrdeli jaǵdaılarda durys sheshim qabyldaýdy úıretedi. Bizdiń mindet – óskeleń urpaqtyń qaýipsizdik mádenıetin jáne jaýapkershilik sezimin qalyptastyrý. Mektepterdegi júıeli jumysty jalǵastyryp kelemiz, sebebi aldyn alý — árdaıym saldarmen kúresýden tıimdi, – dedi Almaty qalasy polısıa departamentiniń qoǵamdyq qaýipsizdik basqarmasynyń bastyǵy Asqat Qulbaev.