Ekí elde de kıíz basu ónerí tarıhı jáne kórkemdík mūranyń ajyramas bólígí sanalady, dep habarlaıdy aqshamnews.kz tílshísí.
Almatyda vengr halyqtyq kıíz basu óneríníń sheberí Karoı Marton-Syonegıdíń sheberlík dárísí óttí. Ís-sharany Vengrıyanyń Almatydaǵy Bas konsuldyǵy Qazaq-Oner ūlttyq qauymdastyǵymen bírlesíp, Almaty qalasy ákímdígíníń qoldauymen ūıymdastyrdy.

Karoı Marton-Syonegı – Junior Prima syılyǵynyń laureaty jáne «Halyq óneríníń jas sheberí» qūrmettí ataǵynyń ıegerí. Ol shyǵarmashylyǵynda vengr halqynyń dástúrlí qolóner ádísterín qoldana otyryp, tarıhı mūrany zamanauı kórkemdík sheshímdermen ūshtastyrady.
Sheberdíń sabaǵy barysynda qatysushylar vengr halqynyń kıíz basu óneríníń erekshelíkterímen, tabıǵı júndí óńdeudíń dástúrlí tásílderímen jáne olardy zamanauı ónerde qoldanu joldarymen tanysty. Sonymen qatar Qazaqstan men Vengrıya arasyndaǵy mádenı baılanysqa erekshe nazar audaryldy. Óıtkení ekí elde de kıíz basu ónerí tarıhı jáne kórkemdík mūranyń ajyramas bólígí sanalady.

Mūndaı bastamalar halyqaralyq mádenıet almasu múmkíndíkterín keńeıtíp, kásíbı tájírıbe almasuǵa jol ashady. Sondaı-aq dástúrlí qolóner túrlerín saqtauǵa jáne olardyń jańa baǵytta damuyna yqpal etedí.
Almatynyń turızm basqarmasy kreatıvtí ındustrıyany damytuǵa, mádenı mūrany dárípteuge jáne halyqaralyq baılanysty nyǵaıtuǵa baǵyttalǵan jobalardy qoldaıdy. Osyndaı ís-sharalardyń ótkízíluí Almatynyń halyqaralyq mádenı dıalog alańy retíndegí bedelín arttyruǵa da septígín tıgízedí.