«Almaty» áleumettík-kásípkerlík korporatsıyasy elektr zaryadtau stantsıyalaryn (EZS) ornatu úshín 311 jer telímín bóldí. Árbír uchaskede konkurstyq íríkteuden ótken otandyq ınvestorlar ekí parkomestke eseptelgen quaty 60 kVt-tan bastalatyn bír EZS ornalastyrady. Barlyq stantsıyalar paıdalanuǵa berílgennen keıín qalada elektromobılderdí zaryadtauǵa arnalǵan 622 jańa parkomestr paıda bolady, dep habarlaıdy aqshamnews.kz
Bír uchaskege ınvestordyń eń tómengí salymy 10 mln teńgení qūraıdy. Būl rette halyq úshín akkumulyatorlyq batareyany zaryadtaudyń 1 kVt úshín shektí qūny QQS esebímen 100 teńgeden aspaıdy.
Uchaskeler ūzartuǵa basym qūqyǵy bar ınvestorlarǵa 4 jyl merzímge beríldí.
Zaryadtau stantsıyalaryn ornatu qala tūrǵyndarynyń jappaı tartylatyn jerlerínde-bazarlar, sayabaqtar, kafeler jáne basqa da qoǵamdyq keńístíkter aumaǵynda josparlanuda.
Barlyq stantsıyalar aǵymdaǵy jyldyń sońyna deıín paıdalanuǵa beríledí.
Búgíngí tańda Almatyda jeke aumaqtarda 300-den astam EZS ornatylǵan. Jańa nysandardy eskere otyryp, qala boıynsha zaryadtau stantsıyalarynyń jalpy sany 600 bírlíkten asady.
EZS qūrylysy «2029 jylǵa qaraı barlyq írí qalalarda elektromobılder úshín qajettí ınfraqūrylymdy qūru jóníndegí jol kartasy» sheńberínde júzege asyrylady. Joba Almatydaǵy ekologıyalyq jaǵdaıdy jaqsartu qajettílígíne baılanysty, sondaı-aq megapolıstegí elektr kólíkteríníń ósíp kele jatqan sanyn eskere otyryp íske asyryluda.
Ūlttyq statıstıka byurosynyń derekteríne sáıkes, 2025 jyldyń 1 sáuírínde Almatyda 8 385 elektromobıl tírkelgen. Ótken jyldyń sáıkes kezeńímen salystyrǵanda olardyń sany 1,5 ese óstí.