Almatyda esirtki qylmysyna qarsy is-qımyl jónindegi bólimsheniń qyzmetkerleri men "Býran-314" patrúldik ekıpajynyń birlesken jumysy nátıjesinde tańǵa jýyq Túrksib aýdanyndaǵy jeke turǵyn úı sektorynda 49 jastaǵy azamat ustaldy, - dep habarlaıdy Aqshamnews.kz.
Kúdiktige júrgizilgen jeke tintý barysynda untaq tárizdi zat salynǵan oramalar tabyldy. Sot-hımıalyq saraptama qorytyndysyna sáıkes, tárkilengen zat sıntetıkalyq esirtki ekeni anyqtaldy. Zattyń jalpy salmaǵy 7 gramnan asady. Atalǵan derek boıynsha Túrksib aýdandyq polısıa basqarmasynda qylmystyq is qozǵalyp, kúdikti ýaqytsha ustaý ızolátoryna qamaldy.
– Bul baǵyttaǵy jumys júıeli túrde júrgizilip keledi. Biz esirtkini taratý arnalary men osy qylmystyq bıznespen aınalysatyn tulǵalardy anyqtaý baǵytynda turaqty jumys júrgizip kelemiz. Ásirese, turǵyn úı sektorynda jedel áreket etip, profılaktıkalyq sharalardy kúsheıtý asa mańyzdy, sebebi mundaı ortada esirtki kez kelgen adamǵa qoljetimdi bolýy múmkin, – dedi Almaty qalasy polısıa departamentiniń esirtki qylmysyna qarsy is-qımyl basqarmasynyń bastyǵy Murat Jumabaev.
Spıkerdiń sózinshe, esirtki qylmysyna qarsy kúres polısıa qyzmetiniń basym baǵyttarynyń biri bolyp qala beredi.
– Azamattardy beıjaı qalmaýǵa shaqyramyz. Kúdikti áreketter týraly kez kelgen aqparat esirtkiniń taralýyna tosqaýyl qoıýǵa kómektesedi. Birlesken kúsh-jiger arqyly biz balalarymyz ben jastarymyzdy osy qaýipti indetten qorǵaýymyz qajet, – dep tolyqtyrdy Murat Jumabaev.