Almaty qalasynyń ákimdigi qalalyqtardy epıdemıologıalyq qaýipsizdik erejelerin saqtaýǵa shaqyrady.
Almaty qalasy ákiminiń orynbasary Erjan Babaqumarov aýmaqtyq sanıtarlyq-epıdemıologıalyq baqylaý departamentiniń basshysy, megapolıstiń bas memlekettik sanıtarlyq dárigeri Jandarbek Bekshınmen jáne qalalyq qoǵamdyq densaýlyq basqarmasy basshysynyń orynbasary Laýra Myrzaǵalımen birge COVID-19 qarsy vaksınalaý pýnktteriniń jumysyn jáne qoǵamdyq oryndardaǵy shekteý sharalarynyń saqtalýyn tekserdi, dep habarlaıdy Almaty-akshamy.kz.
Negizgi maqsat – úndilik «delta» shtamynyń sırkýlásıasy aıasynda epıdemıologıalyq ahýaldyń nasharlaýy saldarynan qalalyqtardyń ómiri men densaýlyqtaryn qorǵaý úshin vaksınalaý qarqynyn arttyrý.
Emhanalarda, saýda oıyn-saýyq ortalyqtarynda, ýnıversıtetter men megapolıstegi bazarlarda ornalasqan vaksına salý pýnktterin aralady. Olardyń ishinde ál-Farabı atyndaǵy QazUÝ aýmaǵyndaǵy Smart helth city, Almaty Mall SOSO, “Máskeý” SOSO jáne basqa vaksınalaý pýnktteri.
Vaksınalaý pýnktterindegi sanıtarlyq normalardyń saqtalýyna, vaksınanyń tıimdiligine áser etetin sýyq tizbek rejımin saqtaýǵa nazar aýdaryldy. Qalanyń barlyq aýdandaryndaǵy 208 egý pýnktterinde vaksınalaýǵa arnalǵan sanıtarlyq erejeler talaptarynyń saqtalýyn tekserý úshin jumys toptary quryldy.
Almaty Mall saýda-oıyn-saýyq ortalyǵyndaǵy vaksınasıalaý ortalyǵynyń qyzmetin tekserý barysynda №18 qalalyq emhananyń terapevti Symbat Berdibek vaksına saldyrýǵa nıet bildirgender qatarynyń artýy qalalyqtardyń vırýstyń qaýpi týraly jaqsy habardar ekendikterin jáne almatylyqtardyń áleýmettik jaýapkershilikteriniń óskenin kórsetetinin aıtty.
«Turǵyndar tarapynan qyzyǵýshylyq óte joǵary, kún saıyn bizge vaksına alý úshin 200-den 250-ge deıin adam keledi, qazirgi kezde biz 4000-ǵa jýyq adamǵa vaksına saldyq. Vaksınalar salqyndatqysh jáne muzdatqysh kameralarda saqtalady. Mysaly, Spýtnık V vaksınasynyń dozalary -18 den -24 deıingi temperatýrada, qazaqstandyq vaksına +2 +8 gradýs Selsııde saqtalady», - deıdi №18 qalalyq emhananyń terapevti Symbat Berdibek.
Aıta ketsek, ótken táýlikte Almatyda barlyǵy 12 275 adamǵa vaksına salyndy. Barlyq kezeńde 450 myńǵa jýyq almatylyq ekpe aldy.
Jumys toby sonymen birge qala asqanalarynyń biri Qaganat-qa bardy. Onda tekserý kezinde kelýshilerdiń maska rejımin, áleýmettik araqashyqtyqty saqtamaı, sanıtarlyq normalardy buzǵany anyqtaldy.
Almaty qalasy ákiminiń orynbasary Erjan Babaqumarov jumys saparynyń qorytyndysy boıynsha onlaın formatta qalanyń medısınalyq uıymdarynyń basshylarymen, sondaı-aq aýdan ákimdikteriniń basshylyǵymen turǵyndarǵa medısınalyq qyzmet kórsetý sapasy men jumysyna baılanysty keńes ótkizdi. Aýdan ákimdikterine medısınalyq uıymdarmen birge aqparattyq-túsindirý jumystaryn kúsheıtý tapsyryldy. Mysaly, saýda-oıyn-saýyq ortalyǵy men SÚ-ne baratyn azamattar ǵımaratqa kirgen sátten bastap COVID-19-qa qarsy vaksınasıa múmkindigi týraly habardar bolýy jáne vaksına alýdyń mańyzdylyǵy týraly tıisti aqparatty kórýi kerek.
Megapolıstegi epıdemıologıalyq ahýal mýtasıalanǵan «delta» shtamynyń taralýyna baılanysty kúrdelene túsip, onyń úles salmaǵy 78%-ǵa jetti. Sońǵy aptada koronavırýspen aýyrǵandar sany 1,7 esege ósti. Máselen, ótken táýlikte koronavırýstyq ınfeksıanyń 253 jaǵdaıy anyqtaldy. Sońǵy aptada KVI belgileri bar naýqastardyń úlesi 32%-dan 53%-ǵa deıin ósti. Bul málimetter "delta" shtamynyń COVID-19 patogendiginiń joǵary ekendigin kórsetedi. Epıdemıologtardyń aıtýynsha, "delta" shtamy óte juqpaly jáne anyqtalǵan shtamdarǵa qaraǵanda 60%-ǵa kóp juqtyrady. Ǵalymdardyń zertteýleri kórsetkendeı, koronavırýstyń úndi shtamyn juqtyrǵanlar aýrýhanaǵa jatqyzylady, tipti keı jaǵdaıda ajal qushýy da yqtımal.
Almaty qalasynyń ákimdigi qalalyqtardy epıdemıologıalyq qaýipsizdik erejelerin saqtaýǵa shaqyrady: betperde kıip, áleýmettik araqashyqtyqty saqtaý qajet, adamdar kóp shoǵyrlanǵan jerlerge barýdan bas tartqan jón. KVI-da qorǵanys pen baqylaýdyń jalǵyz ádisi vaksına alý (aqysyz) ekenin eskerý qajet.