Óńirlik komýnıkasıalar qyzmeti alańynda ótken baspasóz konferensıasynda Almaty qalasy Sport basqarmasynyń basshysy Darhan Nurhanuly beıimdi sportty damytý men erekshe qajettiligi bar adamdardyń dene shynyqtyrýmen aınalysýyna jaǵdaı jasaý týraly baıandady.
Almatyda beıimdi sport «Almaty» sport klýbynyń bazasynda damyp jatyr. Bul qaladaǵy osyndaı jalǵyz memlekettik mamandandyrylǵan klýb. Qazir munda densaýlyǵynda kináraty bar 756 sportshy jattyǵady eken.
8 bólimshe jumys isteıtin klýbta paralımpıadalyq, sýrdlımpıadalyq, ulttyq jáne ınklúzıvti baǵyttardy qosa alǵanda, sporttyń 23 túri bar. Barlyǵyn bilikti mamandar jattyqtyrady, sabaqtary da tegin ótedi.
2025 jyldyń qorytyndysy boıynsha «Almaty» klýbynyń sportshylary joǵary nátıje kórsetti. Olarǵa 438 sporttyq ataq berilip, ártúrli deńgeıdegi 48 jarysta 462 medal jeńip alǵan. Jalpy medal qorjynynda 180 altyn, 142 kúmis pen 140 qola júlde bar. Bul júıeli jumystyń arqasy.
Mańyzdy oqıǵanyń biri – klýbtyń 12 ókiliniń Tokıoda ótken XXV jazǵy Sýrdlımpıada oıyndaryna qatysýy boldy. Bul jarysta almatylyq sportshylar 2 kúmis pen 2 qola medal jeńip alyp, qalamyz ben elimizdi halyqaralyq arenada álemge áıgilep, laıyqty túrde tanytyp qaıtty.
Almatyda beıimdi sportty odan ári damytý maqsatynda Almaty qalasynyń ákiminiń tapsyrmasymen Raıymbek dańǵyly, 312 mekenjaıynda ınklúzıvti sport ortalyǵy da salyna bastady. 21 sport túrine arnalǵan Sport kesheni bir aýysymda 100 adamǵa deıin qabyldaıdy.
Jobanyń júzege asýy paralımpıadalyq, sýrdlımpıadalyq jáne ınklúzıvti sportpen aınalysý múmkindikterin edáýir keńeıtip, barlyq sanattaǵy sportshylarǵa jaǵdaı jasap, teń múmkindik beredi.
Sondaı-aq 2017 jyldan beri Almatyda aýtızmniń belgisi bar balalarǵa arnalǵan taý shańǵysymen beıimdi syrǵanaý jobasy da júzege asyp kele jatqany aıtyldy. Bul joba qazir turaqty suranysqa ıe bolyp otyr.
Sabaqtar balalardyń qımyl-qozǵalys úılesimdiligin, áleýmettený daǵdylaryn jáne ózine degen senimdiligin damytýǵa kómektesip, olardyń jan-jaqty damýy úshin qaýipsiz ári qoldaýshy orta qalyptastyrady.
Sóz sońynda Darhan Nurhanuly beıimdi sportty damytý Almatynyń ınklúzıvti jáne qoljetimdi sporttyq keńistigin qalyptastyrýǵa baǵyttalǵan sport saıasatyndaǵy basym baǵyt bolyp qala beretinin atap ótti.