Óńirlik komýnıkasıalar qyzmetiniń baspasóz konferensıasy kezinde Almatydaǵy joldardyń jaǵdaıy týraly aqparatty qalalyq mobıldilik basqarmasynyń basshysy Ǵanı Myrzahanov habarlady. Ol bıyl megapolıste 206 shaqyrym jol jóndeletinin aıtty, dep habarlaıdy almaty-akshamy.kz
Qalalyq mobıldilik basqarmasynyń basshysy Almatyda kóshe men jol torabynyń jalpy uzyndyǵy 3 096 shaqyrymdy quraıtynyn, onyń 298 shaqyrymy asfálttalmaǵanyn atap ótti.
«Almatyda 2025 jylǵa qaraı joldardy 95%-ǵa jaqsy jáne qanaǵattanarlyq jaǵdaıǵa jetkizý úshin 350 shaqyrym jańa jol salýdy josparlaýdamyz», - dedi Ǵanı Myrzahanov.
Spıkerdiń aıtýynsha, Almatyda 2021 jyldyń basynan beri 125 393 sh.m alańnyń shuńqyrlary jóndeldi, 1058 lúk pen torlar kóterildi, 3 188 bordúrler túzetildi jáne 93 914 syzattar mastıkamen toltyryldy.
Ǵ. Myrzahanov aǵymdaǵy jyly uzyndyǵy 206 shaqyrym bolatyn 212 kóshedegi joldardy ortasha jóndeýdi júrgizý josparlanyp otyrǵanyn qosty. Onyń ishinde uzyndyǵy 43 km 20 negizgi kóshede: Rysqulov, Súıinbaı dańǵyldary, Sátbaev, Kýderın, Jansúgirov, Raıymbek, Iassaýı, Shalápın, Momyshuly, Jandosov, Seıfýllın, Qurmanǵazy kósheleri, SHAAJ, TR Halıýllın kóshesi – Qulja trakty, Soltústik aınalma kóshesi, Býrýndaı, Táttibekov, Omarov, Tóle bı kósheleri.
«Qazirgi kezde 95 kóshede jóndeý jumystary aıaqtaldy, onyń ishinde 12 negizgi kóshe, uzyndyǵy 24 km, jergilikti 83, uzyndyǵy 68,2 km, 39 kóshede jumys júrgizilýde. Jol jumystaryn aıaqtaý jáne kólikterdiń negizgi kósheler boıymen ótýin qamtamasyz etý qyrkúıek aıynyń sońyna deıin josparlanǵan. Barlyq basqa aýdandyq mańyzy bar kóshelerde jóndeý jumystaryn qazan aıynyń sońyna deıin aıaqtaý josparlanyp otyr», - dep qosty Almaty QMB basshysy.
Ǵ. Myrzahanov taýly aýdandardaǵy joldardy kútip ustaý týraly aıtty. Jazda jáne qysta qaýipsizdikti qamtamasyz etýge arnaıy tehnıka kómektesedi. Medeý jáne Shymbulaq aımaqtarynda joldardy kútip ustaý pýnktteri bar. Spıker taýly aımaqtardaǵy joldardy kútip ustaý aýdandyq ákimdikterdiń quzyrynda ekenin atap ótti.