Qazaqstan Respublıkasynyń Prezıdentí Qasym-Jomart Toqaevtyń tapsyrmasy boıynsha Almaty qalasynyń ákímí Darhan Satybaldy megapolıstíń mádenıet jáne eńbek ūjymdarynyń kórnektí ókílderíne memlekettík nagradalardy tabys ettí.
«Otan» ordenímen otandyq ádebıettí damytuǵa, ruhanı qūndylyqtardy saqtauǵa jáne qazaq mádenıetín ílgeríletuge qosqan zor úlesí úshín belgílí qazaqstandyq jazushy Tynymbaı Nūrmaǵanbetov marapattaldy. Saltanatty rásím 2025 jyly elímízde jarıyalanǵan Jūmysshy mamandyqtar jyly ayasynda óttí.
Tynymbaı Nūrmaǵanbetovtí qūttyqtaı otyryp, Almaty ákímí jazushyǵa kóp jylǵy ádebı qyzmetí, ūlttyq ıdeyaǵa adaldyǵy jáne Qazaqstannyń ruhanı mūrasyn damytuǵa qosqan eleulí úlesí úshín alǵys bíldírdí.
Tynymbaı Nūrmaǵanbetūly Nūrmaǵanbetov - qazírgí qazaq prozasynyń jarqyn ókílderíníń bírí, eńbek ardagerí. 1945 jyly Qyzylorda oblysy Jańaqorǵan audanynda dúnıege kelgen. N. V. Gogol atyndaǵy Qyzylorda pedagogıkalyq ınstıtutynyń fılologıya fakultetín, sondaı-aq, Máskeudegí M. Gorkıı atyndaǵy Ádebıet ınstıtutynyń janyndaǵy Joǵary ádebı kurstardy bítírgen.
Jarty ǵasyrdan astam shyǵarmashylyq qyzmet barysynda jazushy onnan astam jınaq shyǵardy, onyń íshínde «Qauyn ıísí», «Qosh bol, ata», «Qarlyǵashtyń ūyasy», «Tūnyq su», «Aıqaı» jáne basqalary bar. Jazushy shyǵarmalary írí odaqtas baspalarda jaryq kórdí, orys jáne basqa da bírqatar tílge audaryldy. Al onyń pesalary jelísímen qoıylymdar qazaq teatrlarynyń sahnalarynda qoıylyp keledí.
M. Gorkıı atyndaǵy Búkílodaqtyq jastar syılyǵynyń jáne Qazaqstan Respublıkasynyń Abaı atyndaǵy ádebıet jáne óner salasyndaǵy Memlekettík syılyǵynyń laureaty, «Qūrmet» ordeníníń ıegerí Tynymbaı Nūrmaǵanbetov qazaq mádenıetín baıytuǵa jáne qoǵamnyń ruhanı damuyna baǵa jetpes úles qosty.
Sonymen qatar Memleket basshysynyń tapsyrmasy boıynsha Ahanaev Dónesbaı Ótepbaıūly marapattaldy. Ol - «Almaty Su» MKK Túrksíb audandyq paıdalanu uchaskesíníń slesarí.
Kásíporynda jūmys ístegen kezden berí Dónesbaı Ótepbaıūly ózín kásíbı bílíktí, eńbekqor, jauapty jáne ísker qyzmetker retínde kórsettí. Apatty uchaskelerge jedel baryp, shūǵyl jáne ūtymdy sheshímderdí dereu qabyldau qabíletímen erekshelenedí.
«Almaty Su» MKK Jetísu audandyq paıdalanu uchaskesíníń slesarí Lıtvınov Dmıtrıı Aleksandrovıch te «Eren eńbegí úshín» medalímen marapattaldy. Dmıtrıı Aleksandrovıch ózíníń kúndelíktí qajyrly eńbegí arqyly Almaty qalasynyń su qūbyry jelíleríníń úzdíksíz jūmys ísteuín qamtamasyz etuge eleulí úles qosyp keledí. Sonyń arqasynda shahardyń on myńnan asatyn tūrǵyny sapaly jáne tūraqty auyz sumen qamtamasyz etílude.
Memlekettík marapattar kóp jylǵy adal eńbek, joǵary kásíbılík, qala sharuashylyǵynyń damuyna qosqan eleulí úles úshín tabystaldy.