"Aktıv Lombard" jelísíníń ıesíne qatysty tergeu ayaqtaldy

Qazaqstan Respublıkasy Qarjylyq monıtorıng agenttígí zańsyz kásípkerlík qyzmet jáne qylmystyq jolmen alynǵan kírísterdí zańdastyru derekterí boıynsha S.S. Koınov pen basqa da qatysy bar tūlǵalarǵa qatysty tergeudí ayaqtady, - dep habarlaıdy aqshamnews.kz tílshísí.

Eske salsaq, byltyr qyrkúıekte komıssıyalyq dúken retínde jasyrynǵan írí lombardtar jelísí arqyly zańsyz mıkrokredıt beru shemasy anyqtalǵan bolatyn.

"Aktıv Lombard" jelísíníń ıesí S.S. Koınov komıssıyalyq qyzmettí paıdalana otyryp, jeke tūlǵalarǵa jasyryn túrde mıkrokredıt berudíń zańsyz shemasyn ūıymdastyrdy degen kúdíkke ílíndí.

Qyzmetíne zańdylyq sıpat beru úshín S.S. Koınov materıaldyq-tehnıkalyq bazasy men ákímshílík resurstary bar ózíne baǵynysty "Aktıv Lombard" JShS-ín paıdalanyp, senímdí tūlǵalardyń atyna tírkelgen jáne formaldy túrde komıssıyalyq saudamen aınalysqan "One Billion Sales", "The Best Seller" jáne "Shark in Sales" JShS sıyaqty baılanysy bar zańdy tūlǵalar jelísín qūrdy.

Būl kompanıyalar "Aktıv Market" bíryńǵaı brendímen áreket etíp, ís júzínde múlíktí kepílge alyp, joǵary paıyzdyq mólsherlememen mıkrokredıtter beru úshín paıdalanylǵan. Komıssıyalyq bólímsheler "Aktıv Lombard" JShS fılıaldarymen bír ǵımaratta ornalasqan, al klıentterge qyzmet kórsetudí bírdeı qyzmetkerler júzege asyrǵan.

Tūtynushylarmen jasalǵan komıssıyalyq sharttar formal jáne jalǵan sıpatta bolǵan. Syıaqy mólsherlemesíníń ortasha deńgeıí táulígíne 1,73%-dan 2,07%-ǵa deıín jetíp, belgílengen normadan (0,3%) 5 esege joǵary bolǵan, būl azamattardyń qūqyqtarynyń eleulí būzyluyna ákelgen.

Nátıjesínde 1,9 mln-nan astam shart jasalyp, qylmystyq kírís kólemí 19 mlrd teńgeden asqan.

Tergeu materıaldaryna sáıkes, qylmystyq kírísterdíń shyǵu kózín jasyru maqsatynda S.S. Koınov olardy zańdastyrudyń kóp deńgeılí shemasyn ázírlep, íske asyrǵan.

Ol úshín baılanysy bar kompanıyalarmen jasalǵan jalǵan sharttar, sondaı-aq banktík shottar arasynda aqshany bírneshe ret audaru arqyly keıínnen dıvıdend túrínde shyǵaru paıdalanylǵan. Osy tásílmen 5 mlrd teńgeden astam qarajat shyǵarylǵan.

Sonymen qatar, S.S. Koınov baǵdarlamalyq qamtamasyz etu ázírleu salasynda formaldy túrde qyzmet kórsetken "Zeus Co" JShS-ín tírkegen. Baǵdarlamalyq qamtamasyz etudí engízu jáne súıemeldeu qyzmetterí kórsetíldí degen jeleumen baılanysy bar kompanıyalarmen qūny asyra kórsetílgen sharttar jasalyp, nátıjesínde "Zeus Co" JShS shottaryna 2,5 mlrd teńge túsken, onyń 2,2 mlrd teńgesí S.S.Koınovqa dıvıdend túrínde audarylǵan.

Sot sanktsıyasymen konfıskatsıyalau maqsatynda jalpy qūny 8,9 mlrd teńge bolatyn jyljymaly jáne jyljymaıtyn múlíkke, jarǵylyq kapıtaldaǵy úlesterge jáne zergerlík būıymdarǵa tyıym salyndy.

Tyıym salynǵan múlík qatarynda: elordadaǵy 4 páter jáne 2 tūrǵyn úı, BAÁ-degí 4 apartament, 6 avtokólík, onyń íshínde Lexus LX 600, Rolls Royce Cullinan, Mercedes-Benz G63, Bentley Bentayga V8, Land Rover Range Rover Sport, sondaı-aq depozıttík shottardaǵy 2,7 mlrd teńge kólemíndegí aqshalaı qarajat bar.

S.S. Koınov qamauǵa alyndy. Onyń tórt sybaılasyna qatysty elden shyqpau jáne tıístí mínez-qūlyq turaly qolhat túríndegí būltartpau sharasy qoldanyldy.

Qazaqstan Respublıkasy QPK 201-babyna sáıkes ózge aqparat jarıya etílmeıdí.