Búgín Ǵylym ordasynda joǵary bílím jáne ǵylym salasyndaǵy syılyqtar men memlekettík ǵylymı stıpendıya laureattaryn saltanatty marapattau rásímí óttí. Mūnda otandyq ǵylymnyń damuyna úles qosyp júrgen bírqatar ǵalymdardyń eńbegí joǵary baǵalandy. Būl joǵary bílím salasyndaǵy oqytushylar men zertteushílerdíń áleuetín arttyruǵa, bílím men ǵylymnyń qoǵamdaǵy rólín kúsheıtuge baǵyttalyp otyr.Respublıkalyq deńgeıdegí marapat ıeleríníń qatarynda Abaı unıversıtetíníń ǵalymdary dabar.
Saltanatty basqosuǵa QR Ǵylym jáne joǵary bílím mınıstrí Sayasat Nūrbek, QR Prezıdentíníń janyndaǵy QR Ūlttyq ǵylym akademıyasynyń prezıdentí Aqylbek Kúríshbaev, JOO men ǵylymı-zertteu ınstıtuttarynyń basshylary, zıyaly qauym ókílderí jáne jetekshí ǵalymdar men oqytushy-professorlar qatysty.
Jıyndy ashqan Sayasat Nūrbek memleket damuyndaǵy joǵary bílím men ǵylymnyń rólíne toqtalyp, aldaǵy júktelgen míndetterdí saralady. Sonymen qatar, «myńnan tūlpar, júzden júırík» shyqqan úzdík ǵalymdardy qūttyqtap, zor tabys tíledí.
Sahna tóríne shyǵyp marapat alǵan úzdíkterdíń qatarynda Abaı unıversıtetíníń bír top ǵalymy bolǵanyn aıta ketuímíz kerek. Atap aıtsaq, p.ǵ.d., professor-zertteushí Ūljarqyn Abdıgapbarova «Memlekettík ǵylymı stıpendıya ıegerí» atansa, PhD, Óner fakultetíníń dekany Kárím Baıǵūtov «Daryndy jas ǵalymdarǵa arnalǵan ǵylymı stıpendıya ıegerlerí» respublıkalyq baıqauynyń jeńímpazy jáne «Memlekettík ǵylymı stıpendıya ıegerí» atandy.
– Būl – tek jeke jetístík emes, būl – otandyq ǵylymǵa kórsetílgen qoldaudyń naqty nátıjesí. Osyndaı múmkíndík jasap, ǵylym men joǵary bílím salasyna aıryqsha kóńíl bólíp otyrǵan Memleket basshysyna, Qazaqstan Respublıkasy Ǵylym jáne joǵary bílím mınıstrlígíne, sondaı-aq bízge árdaıym qoldau kórsetíp kele jatqan unıversıtet basshylyǵyna rızashylyǵymdy bíldíremín. Būl sením bízge jańa ǵylymı ízdenísterge jol ashyp, el damuyna qyzmet etuge úlken jauapkershílík júkteıdí, – dedí Kárím Baıǵūtov kórsetílgen joǵary sením men qoldau úshín alǵysyn bíldíríp.
Sonymen qatar, joǵary bílím berudegí pedagogıkalyq sheberlígín nyqtaǵan 7 oqytushy-professor «JOO-nyń úzdík oqytushysy – 2025» ataǵyn ıelendí. Olardyń qataryda geogr.ǵ.d., professor Bahadurhan Abdımanapov, h.ǵ.k., qauymdastyrylǵan professor Jazıra Mukataeva, PhD, Bıologıya kafedrasynyń meńgerushísí Asıya Maımataeva, PhD, aǵa oqytushy Erlan Isakov, PhD, Ǵylymımetrıya jáne ǵylymı basylymdar ortalyǵynyń jetekshísí Sanat Qūmarbekūly, ped.ǵ.k., postdoktorant Adlet Karıev, PhD, aǵa oqytushy Nurjanat Shakırova bar.
Būl marapattar – Abaı unıversıtetí ǵalymdarynyń júıelí eńbegín, ǵylymı áleuetínjáne bílím men ǵylymdy ūshtastyru jolyndaǵy tabandy ízdenísterín kórseterí anyq.