قازاقستاندا اۋە كومپانياسىنىڭ كىناسىنەن ۋاقىتىندا ۇشا الماعان جولاۋشىنىڭ زاڭ بويىنشا قانداي قۇقىقتارى بار؟
ازاماتتىق اۆياسيا كوميتەتى ءتوراعاسىنىڭ ورىنباسارى دارحان كاتىشيەۆ بيلەت الاردا نە نارسەگە ءمان بەرۋ كەرەگىن ءتۇسىندىردى.
شاعىم كوپ ەكەنىن مويىندايمىز. الەۋمەتتىك جەلىلەردە، وزىمىزگە دە ارىزدار ءتۇسىپ جاتادى. جولاۋشىلارعا ەڭ الدىمەن ايتارىمىز – بيلەت الاردا تاريفكە قاراۋ كەرەك. مىسالى، Fly Arystan-نىڭ 15 ءتۇرلى ءتاريفى بار. اقشاسى قايتارىلاتىن تاريف تە، قايتارىلمايتىن تاريف تە بولادى. ءارقايسىسىنىڭ باعاسى دا ءارتۇرلى، - دەدى ول.
كاتىشيەۆ بيلەت ساتىپ الاردا ونىڭ ەرەجەلەرىنە نازار اۋدارۋ كەرەگىن ەسكەرتتى. قاعيدالاردا بيلەت قۇنىن قاي كەزدە قايتاراتىنى، قاشان قايتارمايتىنى نەمەسە ۆاۋچەرمەن بەرىلەتىنى ناقتى جازىلادى.
سونىمەن قاتار، قازاقستاندا اۋە كومپانياسىنىڭ كىناسىنەن ۋاقىتىندا ۇشا الماعان جولاۋشىنىڭ زاڭ بويىنشا مىنانداي قۇقىقتارى بار:
2 ساعاتتان ارتىق كۇتكەن جاعدايدا – ەكى تەلەفون قوڭىراۋىن شالۋ جانە ەكى ەلەكترون حات جىبەرۋ مۇمكىندىگى؛
2 ساعاتتان ارتىق كۇتكەن جاعدايدا – سالقىن سۋسىندارمەن قامتاماسىز ەتۋ؛
كۇندىز 6 ساعاتتان، تۇندە 8 ساعاتتان ارتىق كۇتكەن جاعدايدا – ىستىق تاماق بەرۋ؛
"انا مەن بالا" بولمەسىنە (بولسا) كىرۋ مۇمكىندىگى؛
6–8 ساعاتتان ارتىق كۇتكەن جاعدايدا – ءقوناقۇي مەن وعان دەيىنگى ترانسفەر؛
5 ساعاتتان ارتىق كەشىككەندە – ۇشۋدان باس تارتىپ، بيلەت اقشاسىن تولىق قايتارىپ الۋ.
5 ساعاتتان ارتىق كۇتكەن ادام ۇشۋدان باس تارتىپ، بيلەت اقشاسىن قايتارا الادى. قايتارىمسىز تاريفپەن الىنعان بيلەت بولسا دا، تولىق اقشاسىن الىپ، ۇشۋدان باس تارتۋعا قۇقىعى بار.