الماتىدا ارميالىق ورتالىق سپورت كلۋبىنىڭ سپورت روتاسىن تولىقتىرعان ساربازدار سالتاناتتى تۇردە اسكەري انت بەردى.
سپورتشىلار، ۇلتتىق قۇراما كوماندالاردىڭ مۇشەلەرى، حالىقارالىق تۋرنيرلەردىڭ جەڭىمپازدارى مەن جۇلدەگەرلەرى اسكەري انت بەردى، دەپ حابارلادى Almaty-akshamy.kz قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
– بۇل سالتاناتتى شارا - ءار ەر-ازامات ءۇشىن ماڭىزدى جانە ەستە قالارلىق ءسات. سىزدەر وتان الدىندا ادال بولۋعا انت بەرىپ، قازاقستان قارۋلى كۇشتەرىنىڭ قاتارىنا كىردىڭىزدەر. ورتالىق سپورت كلۋبىنىڭ سپورت روتاسىندا قىزمەت اتقارۋ - جاۋاپتى ءارى قۇرمەتتى ءىس. سىزدەرگە ورتالىق سپورت كلۋبىنىڭ اسكەرى اتاعىن ابىرويمەن الىپ ءجۇرۋدى، سپورتتا جەڭىستەر مەن جەتىستىكتەرگە جەتۋدى تىلەيمىن، – دەدى قورعانىس مينيسترلىگى سپورت كوميتەتىنىڭ ءتوراعاسى، ورتالىق سپورت كلۋبىنىڭ باستىعى ايتالاپ قۇرعامبايەۆ.
سپورت روتاسىنىڭ قاتارىن 24 سپورتشى تولىقتىردى. ولاردىڭ قاتارىندا 2017 جىلعى الەم چەمپيوناتىنىڭ كۇمىس جۇلدەگەرى، 2018 جانە 2021 جىلدارداعى ازيا چەمپيوناتىنىڭ ەكى دۇركىن كۇمىس جۇلدەگەرى، توكيودا وتەتىن وليمپيادا ويىندارىنىڭ ليسەنزيا يەگەرى، بوكستان حالىقارالىق دارەجەدەگى سپورت شەبەرى ءادىلحان امانقۇل، حالىقارالىق رەيتينگتەگى تۋرنيرلەردىڭ جەڭىمپازى جانە جۇلدەگەرى، ازيا چەمپيوناتىنىڭ ەكى دۇركىن قولا جۇلدەگەرى، تاەكۆوندودان سپورت شەبەرى ايتۋار شايكەنوۆ، 2020 جىلعى حالىقارالىق ءتۋرنيردىڭ جەڭىمپازى، رەسپۋبليكالىق جارىستاردىڭ ءۇش دۇركىن چەمپيونى، بوكستان ق ر سپورت شەبەرى ادىلەت دوسىمبەكوۆ بار.
– ءبىز – وليمپيادا چەمپيوندارى داۋلەت تۇرلىحانوۆ، اناتوليي حراپاتىي، ۆلاديمير سميرنوۆ، ولگا رىپاكوۆا، سەرىك ساپييەۆ سىندى تانىمال الەم چەمپيوندارىنىڭ داستۇرلەرىن جالعاستىرۋشىلارمىز. ءبىز ەلىمىزدىڭ قارۋلى كۇشتەرىن دۇنيەجۇزىلىك اسكەري ويىنداردا جانە باسقا دا جارىستاردا لايىقتى دەڭگەيدە كورسەتەمىز دەپ ويلايمىن، – دەپ اتاپ ءوتتى جاس سارباز ايتۋار شايكەنوۆ.
ارميالىق ورتالىق سپورت كلۋبىندا جاتتىعۋلارعا قاجەتتى جاعداي جاسالعان. اسكەري سپورتشىلارمەن مىقتى نۇسقاۋشىلار مەن جاتتىقتىرۋشىلار اينالىساتىن بولادى. جاڭادان اسكەر قاتارىنا قوسىلعان ساربازدار رەسپۋبليكالىق جانە حالىقارالىق جارىستاردا كوماندالار قۇرامىندا قارۋلى كۇشتەردىڭ نامىسىن قورعايتىن بولادى.
