10 تامىزدا 56 جاستاعى امەريكالىق پوپ-ديۆا دجەننيفەر لوپەس الماتىدا العاش رەت ونەر كورسەتتى. الەمدىك Up All Night تۋرى اياسىندا وتكەن شوۋ قالاداعى ورتالىق ستاديوندا ءوتتى. قاۋىپسىزدىكتى ەكى مىڭنان استام پوليسيا جانە التى ءجۇز اسكەري قاداعالادى، ال 300-گە جۋىق ەرىكتى قوناقتارعا ورىندارىن تابۋعا كومەكتەستى. ال بەيرەسمي جايتتاردان نە ەستە قالدى؟ اqshamnews.kz ماتەريالىنان ءبىلىڭىز.
"كوپتەن كۇتكەن ۇلى توي"
مامىردان باستاپ جۇرت اسىعا كۇتكەن كەشكە كوپشىلىك كونسەرت كۇنى تاڭمەن تالاسا جەتتى. كەلۋشىلەردىڭ قاتارىندا ورتالىق ستاديون ماڭىنا تاڭعى 9-دا بارعاندار دا بولعان ەكەن. ال ەرىكتىلەر مەن ۇيىمداستىرۋشىلار ەرتەرەك كەلىپ، دايىندىققا كىرىستى.
دجەننيفەر لوپەستىڭ Up All Night اتتى الەمدىك تۋرى اياسىنداعى كوپتەن كۇتكەن كونسەرتى ءۇشىن قالاعا 8 مىڭنان اسا تۋريست ارنايى كەلدى. الدىن الا مالىمەتكە سۇيەنسەك، كورەرمەندەردىڭ ۇشتەن ءبىرى – الەمنىڭ تۇكپىر-تۇكپىرىنەن كەلگەن قوناقتار.
كونسەرت بيلەتتەرى تۇگەلدەي ساتىلىپ كەتكەن. ولاردى 35-تەن اسا ەلدىڭ تۇرعىندارى ساتىپ العان. ەڭ كوپ قىزىعۋشىلىق تانىتقاندار: تمد ەلدەرى، ەۋروپا، اقش، ءباا، سونداي-اق كانادا، تۇركيا، جاپونيا، جۇڭگو جانە وڭتۇستىك كورەيا ازاماتتارى.
سۋرەت: سامات قۇسايىنوۆ
دجەي لو ساحنادا
دجەننيفەر لوپەس ساحناعا شامامەن كەشكى 9-عا قاراي شىقتى. وعان دەيىن ءانشى سادراددين كورەرمەندەردىڭ كوڭىلىن اۋلاپ اندەرىن شىرقادى.
ستاديونعا جيىلعان جۇرت دجەي لونى كورگەندە بىرنەشە ساعات بويى كۇتكەن توزىمدەرىن دە، شارشاعان سەزىمدەرىن دە ۇمىتتى. 20 مىڭنان استام حالىقتى كورگەن لوپەس تە قۋانىشىن جاسىرماي، كوزىنە جاس الدى.
سۋرەت: سامات قۇسايىنوۆ
گۇلگە تولعان قۇشاق
استانادا دجەننيفەر لوپەسكە جانكۇيەرلەر 3 تال راۋشان گۇلىن سىيلاسا، الماتىدا ونى ۇلكەن گۇل شوقتارىمەن قارسى الدى. ءار قالاداعى بۇل جىلى سىيلىقتار الەمدىك جۇلدىزدى قۋانتتى، ال جانكۇيەرلەردىڭ شىنايى ىقىلاسى كەشتىڭ ەرەكشە كورىنىستەرىنىڭ بىرىنە اينالدى.
لوپەس جاساعان گەندەر پاتي
كونسەرت بارىسىندا ەرەكشە ساتتەردىڭ ءبىرى — جاس جۇپ انشىگە كونۆەرت بەرىپ، بولاشاق بالاسىنىڭ جىنىسىن جاريالاۋدى ءوتىندى. لوپەس ميكروفوننان: "It’s a girl" دەپ جاريالاپ، ستاديوندى شاتتىققا بولەدى.
جەلىدەگى كوپشىلىك "ەندى بۇلار قىزىنىڭ اتىن دجەنييفەر دەپ قوياتىن شىعار" دەپ ازىلدەپ جاتتى.
"باقىتتى شەگىرتكە"
كونسەرت كەزىندە دجەي لونىڭ ۇستىنە شەگىرتكە شىعىپ الدى. موينىنا قونعان شەگىرتكەنى دجەننيفەر سابىرمەن قابىلداپ، قولىمەن قاعىپ جىبەرىپ، كۇلىمسىرەپ، ونەر كورسەتۋىن جالعاستىرا بەردى.
كەيىن بۇل جاندىكتى ايسۇلتان ەسىمدى قازاقستاندىق ۇستاپ، الەۋمەتتىك جەلىدە ازىلدەپ "ساتىلىمعا" قويىپ، ونى استانادان پاتەرگە ايىرباستاۋدى ۇسىندى. شەگىرتكەگە ول سيمۆولدىق تۇردە "مارك ەنتوني" دەگەن ات بەردى.
دجەي لو كومانداسىنداعى ۆوكاليست قازاقستاندىق شوكولادعا "عاشىق بولدى"
امەريكالىق ءانشى، لوپەستىڭ كومانداسىنداعى ۆوكاليست شەرون الەۋمەتتىك جەلىدە "Kazakhstan" قارا شوكولادىنىڭ سۋرەتىن جاريالاپ، ونى "ومىرىندەگى ەڭ ءدامدى شوكولاد" دەپ اتادى. جازبا جەلىدە تەز تاراپ، كوپ ۇزاماي قوناق ءۇي قىزمەتكەرلەرى وعان وتاندىق وندىرۋشىدەن ءبىر قوراپ شوكولاد سىيعا تارتتى.
ول قازاقستاندىقتاردىڭ قوناقجايلىعى مەن اق پەيىلىنە ريزا ەكەنىن جەتكىزدى.
الماتىلىق وتباسىنىڭ داستارحانىنان ءدام تاتقان باس گيتاريست
دجەي لونىڭ كەلۋىمەن ەستە قالعان تاعى ءبىر قىزىق وقيعا: الماتىلىق وتباسى لوپەستىڭ باس گيتاريسىن ۇيىندە قوناق ەتىپ، سارقىت سالىپ جىبەرگەن. بوتا ەسىمدى قالا تۇرعىنىنىڭ ايتۋىنشا، وعان ءىنىسى 15 مينۋت بۇرىن تەلەفون شالىپ، ۇيىنە قوناقپەن كەلە جاتقانىن ايتقان. قوناقتىڭ كىم ەكەنىن سۇراعاندا، ول دجەي لونىڭ باس گيتاريسى ەكەنىن جەتكىزگەن. ءىنىسى گيتاريسپەن باسكەتبول الاڭىندا كەزدەيسوق تانىسىپ، ۇيگە قوناققا شاقىرعان.
ايتا كەتەيىك، استانادا دجەننيفەر لوپەستىڭ كونسەرتىن ۇيىمداستىرعان پروديۋسەر مالىك حاسەنوۆتىڭ ايتۋىنشا، قازىرگى ۋاقىتتا ايگىلى ءانشى شاكيرامەن كەلىسسوزدەر جۇرگىزىلىپ جاتىر. الداعۋ ۋاقىتتا قازاقستاندا ەندى شاكيرا كونسەرت بەرۋى مۇمكىن. سونداي-اق، 19 قىركۇيەكتە ورتالىق ستاديوندا Backstreet Boys ونەر كورسەتەدى. ەكى كۇننەن كەيىن 21 قىركۇيەكتە توپ ەلورداداعى "استانا ارەنادا" كونسەرت وتكىزەدى.