«پاۆلودار وزەن پورتى» اق مەردىگەر ۇيىمى سايران كولىن قايتا جاڭعىرتۋ جۇمىستارىنىڭ قازىرگى دەڭگەيمەن تانىستىردى، دەپ حابارلايدى aqshamnews.kz
ءقازىر جوبانىڭ نەگىزگى قۇرىلىس-مونتاج جۇمىستارى اياقتالدى. ياعني، : ينجەنەرلىك جەلىلەر (سۋارۋ، سۋمەن جابدىقتاۋ، ەلەكترمەن جابدىقتاۋ جانە سىرتقى جارىقتاندىرۋ جۇيەلەرى) سالىندى، جاعالاۋ جەلىلەرى نىعايتىلىپ، بوگەت سالىنعان. اۋماقتى كوگالداندىرۋ جۇمىستارى اۋقىمدى دەڭگەيدە جۇرگىزىلگەن: 3 400-دەن استام اعاش، 15 000-عا جۋىق بۇتا مەن گۇلزار وتىرعىزىلىپ، جالپى كوگالداندىرىلعان اۋماق كولەمى 261 مىڭ شارشى مەترگە جەتكەن.
جوبا ءقازىر سوڭعى ساتىعا ءوتتى. سوڭعى كەزەڭدە جاعاجاي ايماعىن رەتكە كەلتىرۋ، تروتۋار پليتالارى مەن اسفالت توسەۋ، شاعىن ارحيتەكتۋرالىق پىشىندەردى ورناتۋ جۇمىستارى جۇرگىزىلىپ جاتىر.
مەردىگەر ۇيىمنىڭ وكىلى، جوبا جەتەكشىسى رەنات زيلمۋحامەدوۆتىڭ ايتۋىنشا، قازىرگى تاڭدا نىساندا كولدى اباتتاندىرۋ مەن سۋ تولتىرۋعا بايلانىستى قورىتىندى شارالار اتقارىلىپ جاتىر. الايدا، قۇرىلىسشىلار جۇمىس بارىسىندا ينجەنەرلىك جانە تەحنيكالىق كەدەرگىلەرگە ءجيى تاپ بولۋدا. اسىرەسە، اۋا رايىنىڭ قولايسىزدىعى، جوعارى ىلعالدىلىق پەن تۇراقسىز تەمپەراتۋرا ساندىك لوتوستارعا ارنالعان باسسەين تۇبىنە سۇيىق گيدرووقشاۋلاعىش مەمبرانا جاعۋعا كەدەرگى كەلتىرىپ وتىر.
اۋماقتىڭ جەر ءتۇزىلىسى دە ءبىرقاتار قيىندىقتار تۋعىزدى. ۋچاسكە باسشىسى الەكساندر كارانداسوۆتىڭ ايتۋىنشا، جوبالاۋ توبى بەتكەيلەردە جۇمىس ىستەگەن كەزدە ستاندارتتان تىس ينجەنەرلىك شەشىمدەر قابىلداۋعا ءماجبۇر بولعان.
«مۇنداعى توپىراقتار اۋىر، سوندىقتان ولار تۇگەل اۋىستىرىلدى، قازىلعان توپىراق الىنىپ، قۇرىلىم ءۇشىن نەعۇرلىم تۇراقتى باللاست جاسالدى. بۇگىنگى تاڭدا المالى اۋدانى تاراپىنان جاعالاۋدىڭ شىعىس بولىگىندە جۇمىستار تولىعىمەن اياقتالدى. اۋەزوۆ اۋدانى بويىنشا سۋارۋ جۇيەسى جۇمىستارى جۇرگىزىلەدى. سايران كولىن سۋمەن تولتىرعان كەزدە گيدروونىمدەر وتىرعىزۋ جۇزەگە اساتىن بولادى»، - دەدى الەكساندر كارانداسوۆ.
جوبانىڭ باس ساۋلەتشىسى ءارى اۆتورى نەللي لاپتيەۆا اۋماقتاعى توپىراقتىڭ قۇرامىنا تالداۋ جاساپ بەردى. ونىڭ ايتۋىنشا 1971 جىلدارى بۇل ارا قۇم مەن قيىرشىق تاس وڭدەگەن ورىن بولعان، سوندىقتان توپىراعى قۇنارلى توپىراققا جاتپايدى.
ساپالى گيدرووقشاۋلاعىش ماتەريالداردىڭ كەشىگىپ جەتكىزىلۋى دە جوباعا قولبايلاۋ بولىپ كەلگەن.
«تمد ەلدەرىندە سەرتيفيكاتتالعان گيدرويزولياسيانىڭ قاجەتتى كولەمى تابىلماعاندىقتان، تۇركيادان الدىرۋعا تۋرا كەلدى. تاپسىرىس جاڭا جىلعا دەيىن جاسالعان، سوعان قاراماستان ناقتى جەتكىزەتىن ۋاقىتى مامىر ايىنىڭ ورتاسىنا تۋرا كەلدى. بۇل جوبانىڭ قازىرگى كەزەڭىن كەشىكتىرەتىنىن بىلدىك، الايدا جوبانىڭ بەرىكتىگى مەن سەنىمدىلىگى ءۇشىن بۇل قادامعا سانالى تۇردە بارۋعا تۋرا كەلدى،– دەدى رينات زىلمۇحامەدوۆ.
اتالعان مەردىگەر ۇيىم بارلىق دايىندىق شارالارىن اياقتاعاننان كەيىن عانا كولدى سۋمەن توتىرۋدى باستايدى. سۋ تولتىرۋ پروسەسى دە كەزەڭدەرگە ءبولىنىپ جۇزەگە اسىرىلادى. سۋ تولتىرۋ جۇمىسى تولە بي داڭعىلى بويىنداعى شاندوردا ورنالاسقان گيدرومەحانيكالىق قاقپالار ارقىلى جۇزەگە اسىرىلادى.
«2 ماۋسىمدا سۋ تولتىرۋدى باستايمىز. باستاپقى كەزەڭدە 50 پايىز كولەمىندە سۋ تولتىرىلادى. سول ارقىلى سۋدىڭ اعىنى مەن كولەمىن جانە جۇيەلەردىڭ جۇمىسىن باقىلاپ كورەمىز. بارلىعى ويداعىداي بولسا ارى قاراي تولىق تولتىرۋ كەزەڭىنە وتەمىز»، – دەپ ءتۇسىندىردى رينات زىلمۇحامەدوۆ.
جوبانىڭ سوڭعى كەزەڭىندە مەدىگەر ۇيىم اتقاراتىن جاعاجاي ايماعىنىڭ قاۋىپسىزدىگىن تەكسەرۋ، سۋارۋ جۇيەسىن تولىق رەتكە كەلتىرۋ، ۇساق اقاۋلاردى جويۋ جانە لاندشافتتى جۇمىستاردى تولىق اياقتاۋ سىندى قوسىمشا مىندەتتەرى بار.
قايتا جاڭعىرتىلعان سايران كولى بارلىق قاجەتتى سىناقتار مەن سۋ تولتىرۋ جۇمىستارىن اياقتاعاننان كەيىن قالا تۇرعىندارىنىڭ يگىلىگىنە بەرىلەتىن بولادى.