كوپقاباتتى ءۇيدىڭ اۋلاسىندا 6 جاسار بالانى كولىك قاعىپ، وقيعا ورنىنان تاسا بولعان. وقيعا ورنىنان كەتىپ قالعان جۇرگىزۋشى كەيىن تابىلدى، - دەپ حابارلايدى aqshamnews.kz ءتىلشىسى YK-news.kz سايتىنا سىلتەمە جاساپ.
ءمان-جاي
مالىمەتكە سايكەس، جول اپاتى 23 جەلتوقساندا كۇندىز 4-شاعىناۋداندا بولعان.
"التى جاسار بالا پودەزدەن جۇگىرىپ شىعىپ، ءوتىپ بارا جاتقان كولىكتىڭ استىنا ءتۇستى. سوققىدان بالا بىرنەشە مەترگە ۇشىپ كەتكەنىمەن، ورنىنان تۇرا العان. جۇرگىزۋشى سىرتقا شىعىپ، بالامەن سويلەسكەن دە، ءوز ويىنشا "ءبارى دۇرىس" ەكەنىنە كوز جەتكىزگەن سوڭ كولىگىنە ءمىنىپ، كەتىپ قالعان"، - دەلىنگەن ماتەريالدا.
وقيعانى كۋاگەرلەر كورگەن، ولار اپات تۋرالى جەرگىلىكتى چاتتا جازعان. اۋلاداعى بەينەباقىلاۋ كامەرالارى سوقتىعىس ءساتىن ءتۇسىرىپ العان. اقپارات الەۋمەتتىك جەلىلەردە تاراعاننان كەيىن شىعىس قازاقستان وبلىستىق پوليسيا دەپارتامەنتى پىكىر بەردى.
پوليسيا مالىمەتى
"23 جەلتوقساندا ريددەر قالاسىندا Lada X-Ray اۆتوكولىگىنىڭ جۇرگىزۋشىسى تۇرعىن ۇيلەردىڭ ءبىرىنىڭ ماڭىندا كامەلەتكە تولماعان جاياۋ جۇرگىنشىنى قاعىپ كەتتى. جول-كولىك وقيعاسى سالدارىنان زارداپ شەگۋشى مەديسينالىق مەكەمەگە جەتكىزىلدى"، - دەدى ۆەدومستۆو.
پوليسەيلەر جۇرگىزۋشىنى تاۋىپ، بولىمشەگە جەتكىزگەن، ال كولىك مامانداندىرىلعان تۇراققا قويىلعان. ءتيىستى ساراپتامالار تاعايىندالىپ، ناتيجەسىنە قاراي پروسەستىك شەشىم قابىلداناتىنى ايتىلدى.
بالانىڭ جاعدايى
باسىلىم دەرەگىنشە، قالا اكىمدىگى بالانىڭ جاعدايى تۇراقتى ەكەنىن حابارلاعان. دارىگەرلەر كەۋدە تۇسىنىڭ سوعىلعانىن انىقتاپ، قاجەت كومەك كورسەتكەن.