ءماجىلىس سپيكەرى ەرلان قوشانوۆ ۇكىمەتپەن ءوزارا ىس-ارەكەت كەزىندە جىل سايىن قايتالاناتىن پروبلەمالىق ماسەلەلەر تۋرالى ايتتى، دەپ حابارلايدى aqshamnews.kz
"وكىنىشكە قاراي، ءبىز زاڭ جوبالارىن قاراۋ بارىسىندا ۇنەمى ۇكىمەتتىڭ قورىتىندىسىن ۇزاق كۇتۋگە ءماجبۇرمىز. كەيدە ولاردى 7 ايعا دەيىن كۇتەمىز. بۇل جايت مەملەكەت باسشىسى بەرگەن تاپسىرمالاردىڭ ورىندالۋىن، حالىق كۇتىپ وتىرعان ماڭىزدى زاڭداردىڭ ۋاقتىلى قابىلدانۋىن كەشەۋىلدەتەدى"، - دەدى قوشانوۆ پارلامەنت پالاتالارىنىڭ بىرلەسكەن وتىرىسىندا.
بۇدان بولەك، قورىتىندىدا دەپۋتاتتاردىڭ باستامالارىنا قاتىستى ۇكىمەتتىڭ ناقتى ۇستانىمى بولماي جاتادى. ماسەلەن، دەپۋتاتتار ەرەكشە قورعالاتىن تابيعي اۋماقتار تۋرالى زاڭ جوباسىمەن جۇمىس بارىسىندا جەر كودەكسىنىڭ ءبىر بابىنا ەكى ءتۇرلى كوزقاراستى قامتيتىن تۇزەتۋلەر دايىندايدى. ۇكىمەت ۇسىنىلعان ەكى نۇسقانى دا قولداي سالادى.
مەملەكەتتىك ورگاندار قورىتىندى جوباسىن ازىرلەۋگە ءاتۇستى قارايدى. ءبىر پالاتانىڭ دەپۋتاتتارى قولداماعان تۇزەتۋلەرمەن باسقا پالاتا كەنەتتەن كەلىسىپ كەتەدى.
"الايدا زاڭ جوباسىن وزدەرى ازىرلەۋدىڭ ورنىنا، مينيسترلىكتەر ماسەلەنى دەپۋتاتتاردىڭ تۇزەتۋلەرى ارقىلى نەمەسە پارلامەنتكە حات جازۋ ارقىلى شەشۋدى ادەتكە اينالدىرا باستادى"، - دەيدى قوشانوۆ.
ۇكىمەت رەگلامەنتىنە سايكەس، تۇزەتۋلەردى زاڭ جوباسىن ماجىلىستە تالقىلاۋ كەزەڭىندە ەنگىزۋ قاجەت.
"ءبىراق مينيسترلىكتەر تاراپىنان ول نورماعا تىم ءجيى جۇگىنۋ ورىن الىپ وتىر. كەيدە ونداي تۇزەتۋلەر ءتىپتى جالپى وتىرىس وتەتىن كۇنى كەلىپ ءتۇسىپ جاتادى.وسى سەسسيادا اتالعان تارماق بويىنشا ۇكىمەتتەن كەلىپ تۇسكەن حاتتار سانى ەكى ەسە ارتتى. ال بۇل تارماق ەرەكشە جاعدايلاردا، مەملەكەت باسشىسىنىڭ شۇعىل تاپسىرمالارىنا نەمەسە دەرەۋ شەشۋدى قاجەت ەتەتىن ماڭىزدى ماسەلەلەرگە عانا قولدانىلۋى كەرەك"،- دەپ اتاپ ءوتتى سپيكەر.
ونىڭ ايتۋىنشا، مۇنداي ماڭىزدى ماسەلەلەر ۇكىمەت قابىرعاسىندا جان-جاقتى پىسىقتالىپ، حات تۇرىندە ەمەس، زاڭ جوباسى رەتىندە راسىمدەلىپ كەلۋى ءتيىس.
بۇگىندە دەپۋتاتتىق ساۋالدارعا بەرىلەتىن جاۋاپتار دا سىن كوتەرمەيدى. وسى سەسسيا بارىسىندا مەملەكەتتىك ورگاندارعا 625 ساۋال جولداندى.
"ءار ساۋالدىڭ ارتىندا حالىقتى تولعاندىراتىن ماسەلە تۇراتىنى بەلگىلى. الايدا ولارعا بەرىلگەن جاۋاپتاردىڭ مازمۇنى مەن ساپاسىنا كوڭىل تولا بەرمەيدى. تاعى دا جاڭا سۇراقتار تۋىنداتادى. بۇل جاعداي كەيدە دەپۋتاتتاردى مەملەكەتتىك ورگانعا قايتا جۇگىنۋگە ءماجبۇر ەتەدى"، - دەدى قوشانوۆ.
كەلەسى سەسسيادا ۇكىمەت مۇشەلەرى ماجىلىسكە ارنايى شاقىرىلادى. سول كەزدە سپيكەر ايتقان ماسەلەلەر جان-جاقتى تالقىلانادى.