ەل وڭىرلەرىندە شامامەن 2،1 ملن گەكتار اۋىل شارۋاشىلىعى القاپتارى ەگىلدى. كوكتەمگى دالا جۇمىستارى اگروتەحنيكالىق مەرزىمدەرگە سايكەس جۇرگىزىلۋدە.
ەگىس ناۋقانى اسىرەسە ەلىمىزدىڭ وڭتۇستىك وڭىرلەرىندە قارقىندى ءجۇرىپ جاتىر.
ماسەلەن، تۇركىستان وبلىسىندا – 449،2 مىڭ گا، جامبىل وبلىسىندا – 306 مىڭ گا، جەتىسۋ وبلىسىندا – 292،6 مىڭ گا، الماتى وبلىسىندا – 187،9 مىڭ گا جەرگە ەگىن ەگىلدى.
باسقا وڭىرلەردە دە ەگىس جۇمىستارى باستالدى: شىعىس قازاقستان وبلىسىندا – 156،3 مىڭ گا، اباي وبلىسىندا – 138،8 مىڭ گا، قوستاناي وبلىسىندا – 85 مىڭ گا، اقمولا وبلىسىندا – 74،8 مىڭ گا، قىزىلوردا وبلىسىندا – 52،5 مىڭ گا، پاۆلودار وبلىسىندا – 56،9 مىڭ گا، سونداي-اق باسقا ايماقتاردا دا ەگىس ءجۇرىپ جاتىر.
كوكتەمگى دالا جۇمىستارىنا دايىندىق اياسىندا كەلەسى ءىس-شارالار اتقارىلدى: 16،7 ملن گا جەردە ىلعال جابىلدى، 6،1 ملن گا القاپتا سەبۋگە دەيىنگى وڭدەۋ جۇرگىزىلدى، 1،7 ملن گا جەردە كوكتەمگى جىرتۋ جۇمىستارى ورىندالدى.
بۇگىنگى تاڭدا 942،1 مىڭ گا جەرگە ءداندى داقىلدار، 242،8 مىڭ گا جەرگە مال ازىقتىق داقىلدار، 492 مىڭ گا جەرگە مايلى داقىلدار، 118،8 مىڭ گا جەرگە ماقتا، 71،8 مىڭ گا جەرگە كوكونىستەر، 57،7 مىڭ گا جەرگە باقشا داقىلدارى، 32،5 مىڭ گا جەرگە كارتوپ، 15،6 مىڭ گا جەرگە قانت قىزىلشاسى، 26،3 مىڭ گا جەرگە كۇرىش جانە باسقا داقىلدار ەگىلدى.
ەگىس ناۋقانىن ۋاقتىلى ءارى ءتيىمدى وتكىزۋ ءۇشىن 866،8 مىڭ توننا مينەرالدى تىڭايتقىش جەتكىزۋگە شارتتار جاسالدى. 254 تەڭگە/ليتر باعامەن (نارىقتىق باعادان 15% تومەن) 401 مىڭ توننا ديزەل وتىنى ءبولىندى.
بيىلعى جىلعا ارنالعان تۇقىم قاجەتتىلىگى 2،3 ملن توننانى قۇرايدى. قامتاماسىز ەتىلۋ دەڭگەيى – 100%. زەرتحانالىق تەكسەرىس ناتيجەسىندە تۇقىمنىڭ 99%-ى كونديسيالىق دەپ تانىلدى.
اۋىل شارۋاشىلىعى مينيسترلىگى كوكتەمگى ەگىس ناۋقانىنىڭ بارىسىنا مونيتورينگ جۇرگىزۋدى جالعاستىرىپ، وڭىرلەرگە قاجەتتى ادىستەمەلىك جانە ۇيىمداستىرۋشىلىق قولداۋ كورسەتۋدە.