گەرمانيانىڭ فيۋرت قالاسىندا حالىقارالىق ىزدەۋدە جۇرگەن ماقسات دۇيسەنوۆ ۇستالدى، - دەپ حابارلايدى Aqshamnews.kz
بۇل اقپاراتتى قازاقستان رەسپۋبليكاسى ىشكى ىستەر مينيسترلىگى راستادى.
مينيسترلىكتىڭ مالىمەتىنشە، دۇيسەنوۆتى گەرمانيانىڭ قۇقىق قورعاۋ ورگاندارى ق ر ءىىم ينتەرپولدىڭ ۇلتتىق ورتالىق بيۋروسىنىڭ سۇراۋى نەگىزىندە قولعا تۇسىرگەن. ول ينتەرپول جەلىسى بويىنشا حالىقارالىق ىنتىماقتاستىق اياسىندا انىقتالىپ، كەيىننەن قاماۋعا الىندى.
«ق ر ءىىم ينتەرپولدىڭ ۇلتتىق ورتالىق بيۋروسىنىڭ سۇراۋى بويىنشا، گەرمانيا فەدەراتيۆتىك رەسپۋبليكاسىنىڭ فيۋرت قالاسىندا حالىقارالىق ىزدەۋدە جۇرگەن ازامات د. ۇستالدى. ىزدەۋدەگى تۇلعا نەمىس قۇقىق قورعاۋ ورگاندارى تاراپىنان انىقتالىپ، قاماۋعا الىندى»، – دەلىنگەن ءىىم تاراتقان حابارلامادا.
ماقسات دۇيسەنوۆ 2018 جىلدىڭ تامىزىنان 2019 جىلدىڭ ساۋىرىنە دەيىن قازاقستان رەسپۋبليكاسىنىڭ باس كولىك پروكۋرورى قىزمەتىن اتقارعان. ول بۇل قىزمەتكە سول كەزدەگى باس پروكۋرور قايرات قوجامجاروۆتىڭ بۇيرىعىمەن تاعايىندالعان بولاتىن.
ايتا كەتەيىك، قايرات قوجامجاروۆتىڭ ءوزى قازىرگى ۋاقىتتا قىزمەتتىك وكىلەتتىگىن اسىرا پايدالانۋ جانە قىلمىستىق كىرىستەردى زاڭداستىرۋ فاكتىلەرى بويىنشا تەرگەلىپ جاتىر.