جارىس جىل سايىن رەسەي فەدەراسياسىندا وتكىزىلەدى. بيىل ول كراسنودار ولكەسىنىڭ مولكينو كەنتىندە وتۋدە.
قازاقستان رەسپۋبليكاسى قورعانىس مينيسترلىگى ارنايى ماقساتتاعى بولىمشەلەرىنىڭ اسكەري قىزمەتشىلەرى ارنايى ماقساتتاعى بارلاۋ توپتارى اراسىنداعى «جاسىل سوقپاق» دالالىق ماشىقتانۋ كونكۋرسىندا باعىن سىناۋدا، دەپ حابارلايدى Almaty-akshamy.kz ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
«جاسىل سوقپاق» – ەڭ بەدەلدى كونكۋرستىڭ ءبىرى. وعان بالتىق تەڭىزىنەن تىنىق مۇحيتىنا دەيىنگى ارالىقتا ورنالاسقان رەسەي فەدەراسياسىنىڭ بارلىق وكرۋگىنىڭ ارنايى ماقساتتاعى بولىمشەلەرىنىڭ كوماندالارى، سونداي-اق ۇقشۇ ەلدەرىنىڭ ارنايى ماقساتتاعى بولىمشەلەرى قاتىسادى.
سايىس 20-دان استام كەزەڭدى قامتيدى. بارلاۋشىلار الىس قاشىقتىققا جىلجۋ، سۋ كەدەرگىسىنەن ءوتۋ، ارنايى مىندەتتى ورىنداۋ، جاۋىنگەرلىك وق اتۋ جانە بارلاۋ توبىن قارسىلاس تىلىنا شىعارۋ كەزىندە توپتاردىڭ ارەكەت ەتۋىن پىسىقتاۋمەن سايىسقا تۇسەدى. جارىستىڭ بارلىق كەزەڭىن ورىنداۋعا 100 ساعات بولىنەدى. مىندەت توقتاۋسىز ورىندالادى. بەرىكتىك پەن توزىمدىلىكتى انىقتايتىن باستى سىناق 10 جانە 30 كيلومەتر قاشىقتىقتا جۇگىرۋ بولىپ تابىلادى.
جارىستىڭ سوڭعى كەزەڭىندە قاتىسۋشىلار شارتتى قارسىلاستىڭ ديۆەرسيالىق توپتارىن تورۋىلداپ، ولاردىڭ شابۋىلىنا تويتارىس بەرەدى.
قورىتىندىلاۋ كەزىندە بارلاۋشىلاردىڭ اسكەري توپوگرافيا سالاسىنداعى ءبىلىمى، بۇركەمەلەۋ، جاسىرىن جىلجۋ شەبەرلىگى، لاگەردى ۇيىمداستىرۋى، مەديسينالىق جانە ينجەنەرلىك دايارلىق داعدىلارى ەسكەرىلەتىن بولادى.
بارلاۋشىلار كونكۋرسقا قاتىسا وتىرىپ، ءار ءتۇرلى وڭىردە، تابيعي جانە كليماتتىق جاعدايلاردا جاۋىنگەرلىك ءىس-قيمىلداردى جۇرگىزۋدە تاجىريبە جيناقتايدى.
بيىلعى جىلى 47ء-شى رەت وتكىزىلىپ وتىرعان «جاسىل سوقپاق» سايىسى 2 شىلدەدە باستالعان، 13 شىلدەگە دەيىن جالعاسادى.