ەلىمىزدەگى مەگاپوليستەردىڭ ءبارى اۋاسى لاستانعان قالالار قاتارىندا
قازاقستاندا 45 ونەركاسىپتىك قالا بار جانە ونىڭ 10-ىندا اتموسفەرالىق اۋا لاستانۋىنىڭ ەڭ جوعارعى دەڭگەيى تىركەلدى. بۇل تۋرالى ق ر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«كليماتتىڭ وزگەرۋى مەن كومىرتەكتىك بەيتاراپتىققا قول جەتكىزۋ ماسەلەلەرىنىڭ شەشىمىن ەكولوگيالىق پروبلەمالاردى شەشۋ ارقىلى تابا الامىز. قازاقستانداعى نەگىزگى ەكولوگيالىق پروبلەمالار اتموسفەرالىق اۋانىڭ لاستانۋى، جەرۇستى سۋلارى جانە قالدىقتارمەن جۇمىس ىستەۋ جۇيەسىنىڭ ناشارلىعى بولىپ وتىر»، - دەدى مينيستر ۇكىمەت وتىرىسىندا.
اتموسفەرالىق اۋا مونيتورينگىنە سايكەس، 45 ونەركاسىپتىك قالانىڭ ىشىندە 10-ى اتموسفەرالىق اۋا لاستانۋىنىڭ جوعارى دەڭگەيىن كورسەتۋدە. ولار – نۇر-سۇلتان، الماتى، قاراعاندى، تەمىرتاۋ، اتىراۋ، اقتوبە، بالقاش، وسكەمەن، جەزقازعان جانە شىمكەنت قالالارى.
«لاستانۋدىڭ باستى سەبەپتەرى – جابدىقتاردىڭ توزۋى، زاۋىتتارداعى شاڭ تازارتۋ قوندىرعىلارى جۇمىسىنىڭ تيىمسىزدىگى، جاڭعىرتۋ مەن قايتا قۇرۋدىڭ بولماۋى جانە كومىردى پايدالانۋ. جەرۇستى سۋلارىنىڭ لاستانۋىنىڭ نەگىزگى سەبەبى – كارىزدىك-تازارتۋ قۇرىلىس جايلارىنىڭ توزۋى بولىپ وتىر. ال قالدىقتارمەن جۇمىس ىستەۋ سالاسىندا قاتتى تۇرمىستىق قالدىقتار پوليگوندارىنىڭ سانيتارلىق جانە ەكولوگيالىق تالاپتارعا سايكەس كەلمەۋى، ولاردى وڭدەۋ دەڭگەيىنىڭ تومەندىگى جانە ستيحيالىق ۇيىندىلەر پروبلەمالارى وزەكتى بولىپ تۇر»، - دەدى س. برەكەشيەۆ.