2025 جىلعى توعىز ايدىڭ قورىتىندىسى بويىنشا قازاقستاندا استىق جۇكتەرىن تاسىمالداۋ كولەمى 9،5 ملن توننانى قۇرادى.
بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا 40%-عا ارتىق (2024 جىلى – 6،8 ملن توننا)، - دەپ حابارلايدى Aqshamnews.kz.
جالپى كولەمنىڭ 7،3 ملن تونناسى ەكسپورتقا جونەلتىلدى (+43%)، ال 2،2 ملن تونناسى ىشكى باعىتتار بويىنشا تاسىمالداندى (+33%). بارلىق نەگىزگى باعىتتاردا تۇراقتى وڭ ديناميكا بايقالادى.
اتاپ ايتقاندا، 2،2 ملن توننا جەمشوپ تاسىمالداندى. كورسەتكىش وتكەن جىلمەن سالىستىرعاندا 4،6 ەسە ارتىق. بۇل وڭدەۋ سالاسىنىڭ دامۋىن جانە قوسىلعان قۇنى جوعارى تاۋارلار ءوندىرىسىنىڭ ىلگەرىلەۋىن كورسەتەدى.
ورتالىق ازيا ەلدەرىنە (وزبەكستان، تاجىكستان، تۇرىكمەنستان، قىرعىزستان) تاسىمالداۋ كولەمى 34%-عا ارتتى. اقتاۋ جانە قۇرىق پورتتارى ارقىلى يران باعىتىنا تاسىمالداۋ قايتا جاندانىپ، 3،3 ەسە ءوسىپ، 0،7 ملن توننانى قۇرادى. اۋعانستانعا جەتكىزۋ كولەمى 40%-عا ءوسىپ، 179 مىڭ تونناعا جەتتى.
ەكسپورتتىڭ وزگە باعىتتارى بويىنشا دا ايتارلىقتاي ءوسىم بايقالادى:
• رەسەي – 4،2 ەسە (1،7 ملن توننا)؛
• ازەربايجان – 108 ەسە (542 مىڭ توننا)؛
• بالتىق ەلدەرىنىڭ پورتتارى – 14 ەسە (606 مىڭ توننا)؛
• رەسەيدىڭ بالتىق ەلدەرىندەگى پورتتارى – 2،4 ەسە (132 مىڭ توننا)؛
• قارا تەڭىز پورتتارى – 1،4 ەسە (256 مىڭ توننا).
قازاقستان سونداي-اق جاڭا ەكسپورتتىق باعىتتاردى اشتى. ولاردىڭ قاتارىندا افريكا ەلدەرى (ماروككو، الجير)، ۆەتنام جانە ەۋروپالىق وداق مەملەكەتتەرى بار.
استىق جۇكتەرىن تاسىمالداۋ جۇمىسىن ۇيلەستىرۋ جانە ماسەلەلەردى جەدەل شەشۋ ءۇشىن كولىك مينيسترلىگىنە قاراستى جەدەل شتاب جۇمىس ىستەيدى. ونىڭ قۇرامىنا اۋىل شارۋاشىلىعى مينيسترلىگىنىڭ، مەملەكەتتىك كىرىستەر كوميتەتىنىڭ، «قتج» ۇك» اق، «KTZ Express»، «استىق ترانس»، «پرودكورپوراسيا» ۇك، قازاقستان استىق وداعى، سونداي-اق اقتاۋ جانە قۇرىق پورتتارىنىڭ وكىلدەرى كىرەدى.
شتاب وزەكتى ماسەلەلەردى قاراپ، استىقتى ۇزدىكسىز تاسىمالداۋدى جانە سالانىڭ جوسپارلى كورسەتكىشتەرىن ورىنداۋدى قامتاماسىز ەتۋ ماقساتىندا شارالار قابىلدايدى.