وسى كەزگە دەيىن بالاسىن مەكتەپكە بەرگىسى كەلەتىن اتا-انالاردان 285 مىڭنان استام ءوتىنىش تۇسكەن.
قۇجاتتاردى قابىلداۋ 1 تامىزعا دەيىن جالعاسادى، دەپ حابارلايدى Almaty-akshamy.kz ق ر بعم باسپا ءسوز قىزمەتىنە سىلتەمە جاساپ.
بۇل مەرزىم بولاشاق وقۋشىلاردىڭ اتا-انالارى مەكتەپتى الدىن-الا انىقتاپ، قاجەت قۇجاتتاردى ۋاقىتىلى تاپسىرىپ، بالالاردى وقۋ قۇرالدارىمەن قامتاماسىز ەتۋى ءۇشىن بەرىلدى. ال مەكتەپ اكىمشىلىگى سىنىپتاردى الدىن الا جيناقتاۋ، وقۋلىقتاردىڭ قاجەتتى كولەمىن ساتىپ الۋ، مۇعالىمدەر اراسىندا ساعاتتاردى ءبولۋ جانە سىنىپتار سانىنا بايلانىستى پەداگوگتەر قۇرامىن انىقتاۋ بويىنشا جۇمىستاردى اتقاراتىن بولادى.
«ەندى قۇجاتتاردى قابىلداۋ 4 ايعا سوزىلادى، بۇل اتا-انالارعا دا، مەكتەپ اكىمشىلىكتەرىنە دە وقۋ پروسەسىنە دايىندىقتى الدىن الا ويلاستىرۋعا مۇمكىندىك بەرەدى. سونداي-اق 10 تامىزدان كەيىن مەكتەپتەردە دايىندىق توبى جۇمىسىن باستايدى، وعان اتا-انالاردىڭ قالاۋى بويىنشا مەكتەپكە دەيىنگى مەكەمەلەرگە بارماعان نەمەسە مەكتەپالدى دايارلىقتان وتپەگەن بالالار بارا الادى»، – دەپ اتاپ ءوتتى ق ر بعم مەكتەپكە دەيىنگى جانە ورتا ءبىلىم كوميتەتى ءتوراعاسىنىڭ ورىنباسارى جومارت قارامبايەۆ.
وتىنىشتەردى قابىلداۋ ەgov.kz ەلەكتروندىق ۇكىمەت پورتالى ارقىلى ەلەكتروندىق فورماتتا جۇرگىزىلەدى. مەكتەپكە قابىلداۋ ءۇشىن كەلەسى قۇجاتتاردى ۇسىنۋ قاجەت: بالانىڭ دەنساۋلىق جاعدايى تۋرالى قۇجاتتار (بالانىڭ دەنساۋلىق پاسپورتى №026/ۋ-3، №063/ۋ نىسانى بويىنشا مەديسينالىق انىقتاما)؛ بالانىڭ كولەمى 3ح4 سم سيفرلىق فوتوسۋرەتى. ءوتىنىش 1 جۇمىس كۇنى ىشىندە قارالادى.
«قىزىل» ايماققا ەنگەن وڭىرلەردە تۇراتىن اتا-انالار مەديسينالىق انىقتامالاردى وقۋ جىلىنىڭ باستالۋىنا دەيىن الا الادى.
ۆەدومستۆونىڭ بولجامى بويىنشا وسى وقۋ جىلىندا ءبىرىنشى سىنىپقا 380 مىڭنان استام وقۋشى بارادى.