2025 جىلعى تامىز قازاقستاندىقتار ءۇشىن بىرنەشە ماڭىزدى وزگەرىستەر مەن ەرەكشە جاڭالىقتاردان باستالعالى وتىر. بۇل ايدا زاڭناماداعى تۇزەتۋلەردەن باستاپ، حالىقارالىق كونسەرتتەرگە دەيىن ءتۇرلى سالادا تىڭ دۇنيە بار. اqshamnews.kz ءتىلشىسى نازارلارىڭىزعا ەڭ باستى وزگەرىستەردى ۇسىنادى.
اۆتوگاز باعاسى وسەدى
1 تامىزدان باستاپ ەنەرگەتيكا مينيسترلىگى سۇيىتىلعان گازدىڭ شەكتى باعاسىن وزگەرتۋدى جوسپارلاپ وتىر. وزگەرىستەر:
-
كوتەرمە باعا: 51 932 تەڭگەدەن → 59 722 تەڭگەگە/توننا؛
-
بولشەك باعا: وڭىرگە بايلانىستى 7–10 تەڭگەگە/ليترگە وسەدى.
بۇل شەشىم جانارماي قۇيۋ بەكەتتەرىندەگى اۆتوگاز باعاسىنا تىكەلەي اسەر ەتۋى مۇمكىن.
سۋرەت: gov.kz
اقش كەيبىر قازاقستاندىق تاۋارلارعا باج سالىعىن ەنگىزەدى
1 تامىزدان باستاپ اقش قازاقستاندىق ەكسپورتتىڭ ءبىرقاتار تۇرىنە 25% باج سالىعىن ەنگىزەدى. ءبىراق بۇل شەكتەۋ مۇناي، ۋران جانە مەتالدارعا قاتىستى ەمەس.
باج سالىعى كەلەسى ونىمدەرگە اسەر ەتۋى مۇمكىن:
-
فوسفور،
-
بيداي جەلىمى،
-
وپتيكالىق لينزالار جانە ت.ب.
ساراپشىلار بۇل ونىمدەردىڭ قازاقستان ىشىندەگى باعاسىنا دا ىقپال ەتۋى مۇمكىن ەكەنىن جوققا شىعارمايدى.
سۋرەت: gov.kz
پاتەردى قولما-قول ساتىپ الۋعا تىيىم سالىنادى
1 تامىزدان باستاپ ۇلەستىك قۇرىلىس جوبالارىنا قاتىسۋ كەزىندە تەك قولما-قول ەمەس ەسەپ ايىرىسۋعا رۇقسات ەتىلەدى. ەندى قۇرىلىس كومپانياسى مەن ۇلەسكەر اراسىنداعى "قولدان قولعا" پاتەر بەرۋ - زاڭسىزدىق.
ۇلتتىق بانك مۇنى وپەراسيالاردىڭ اشىقتىعى مەن ازاماتتاردىڭ قۇقىقتارىن قورعاۋ ماقساتىندا ەنگىزىپ وتىرعانىن مالىمدەدى. ەندى تولەم تەك جەكە بانك شوتىنان نەمەسە بانك كاسساسى ارقىلى كومپانيا شوتىنا اۋدارىم جاساۋ ارقىلى جۇرگىزىلەدى.
سۋرەت: kn.kz
ۇبت-نىڭ كەزەكتى كەزەڭى وتەدى
10–20 تامىز ارالىعىندا تالاپكەرلەر ۇلتتىق ءبىرىڭعاي تەستىلەۋگە (ۇبت) تاعى قاتىسا الادى. تەستىلەۋ ەكى فورماتتا وتەدى:
-
ەلەكترون فورماتتا – 10–20 تامىز؛
-
قاعاز فورماتىندا – 17–20 تامىز ارالىعىندا.
وعان بيىل جانە بىلتىر مەكتەپ بىتىرگەن تۇلەكتەر، سونداي-اق پەداگوگيكالىق باعىتتار بويىنشا اقىلى وقۋعا تۇسكىسى كەلەتىندەر قاتىسا الادى.
سۋرەت: sheridanmentoring.com
اكۆامادەنيەت زاڭدى كۇشىنە ەنەدى
13 تامىزدان باستاپ "اكۆامادەنيەت تۋرالى" زاڭ رەسمي تۇردە كۇشىنە ەنەدى. بۇرىنعى "بالىق شارۋاشىلىقتارى" ەندى اكۆاكۋلتۋرا سۋبەكتىلەرى رەتىندە زاڭداستىرىلىپ، كەلەسى قىزمەت تۇرلەرىمەن اينالىسا الادى:
-
كول-تاۋارلىق؛
-
توعاندىق؛
-
بالىق ءوسىرۋ جانە باسقا دا باعىتتار.
سونىمەن قاتار، ولار سۋبسيديا، كرەديت، ساقتاندىرۋ جانە جەڭىلدەتىلگەن سالىقتىق رەجيم سەكىلدى مەملەكەتتىك قولداۋ شارالارىنا يە بولادى.
سۋرەت: gov.kz
ۇلتتىق اۋىل شارۋاشىلىعى ساناعى باستالدى
1 تامىز بەن 20 قازان ارالىعىندا قازاقستاندا ۇلتتىق اۋىل شارۋاشىلىعى ساناعى جۇرگىزىلەدى. ول ەكى كەزەڭگە بولىنگەن:
-
1–31 تامىز: رەسپوندەنتتەر ارنايى ۆەب-پورتال ارقىلى ءوز بەتىمەن ساۋالناما تولتىرادى؛
-
20 قىركۇيەك – 20 قازان: ينتەرۆيۋەرلەر جەكە سۇحباتتار وتكىزەدى.
ساناققا فەرمەرلىك، جەكە كاسىپكەرلىك قۇرىلىمدار، اگرارلىق سالادا جۇمىس ىستەيتىن زاڭدى تۇلعالار مەن جەكە قوسالقى شارۋاشىلىقتارى بار ازاماتتار قامتىلادى. جۇمىسقا 5 مىڭنان استام ادام تارتىلادى.
سۋرەت: gov.kz
دجەننيفەر لوپەس قازاقستاندا كونسەرت بەرەدى
امەريكالىق پوپ-ديۆا دجەننيفەر لوپەس العاش رەت قازاقستاندا كونسەرت وتكىزەدى:
-
1 تامىز – استانا ارەنا (استانا)؛
-
10 تامىز – ورتالىق ستاديون (الماتى).
كونسەرتتەر ونىڭ UP ALL NIGHT: LIVE IN 2025 الەمدىك تۋرنەسى اياسىندا وتەدى. بيلەتتەردىڭ باعاسى – 40 مىڭنان 180 مىڭ تەڭگەگە دەيىن ساتىلدى.
cۋرەت: اشىق دەرەككوز
اتا زاڭىمىزدىڭ 30 جىلدىعى اتاپ وتىلەدى
30 تامىز – قازاقستان كونستيتۋسياسىنىڭ 30 جىلدىعى. ەلىمىزدىڭ باستى زاڭى 1995 جىلى جالپىۇلتتىق رەفەرەندۋمدا قابىلدانعان بولاتىن.
مەرەكە سەنبىگە (30 تامىز) تۇسكەندىكتەن، دەمالىس كۇنى دۇيسەنبىگە – 1 قىركۇيەككە اۋىستىرىلادى.
سۋرەت: Almaty.tv