4 شىلدەدە "سپورتتىق الماتى" باعدارلاماسى اياسىندا "نۇرسۇلتان شىڭى" الپينياداسى ءوتتى. الپينيزمگە قىزىعۋشىلىعى بار الماتى تۇرعىندارى ءوز شىڭىن قازاقستان رەسپۋبليكاسى تاۋەلسىزدىگىنىڭ 30 جىلدىعى مەن استانا كۇنىنە ارنادى.
ۇيىمداستىرۋشىلاردىڭ ايتۋىنشا، نۇرسۇلتان شىڭىنا شىعۋعا 16 جاستان باستاپ نيەت بىلدىرگەندەرگە رۇقسات ەتىلدى. الپينيادا مەدەۋ مۇز ايدىنىنان ساعات 5-تە باستالدى.
"سپورتتىق الماتى" قالالىق باعدارلاماسى اياسىندا الپينيادانى ءبىرىنشى جىل وتكىزىپ وتىرعان جوقپىز. بيىلعى ءىس-شارا قازاقستان رەسپۋبليكاسى تاۋەلسىزدىگىنىڭ 30 جىلدىعى مەن استانا كۇنىنە ارنالدى. شاراعا قاتىسۋعا نيەت بىلدىرۋشىلەر قاتارى كوبەيىپ كەلەدى. ادامدار وتباسىمەن كەلەدى. قاتىسۋشىلار اراسىندا جاستار مەن زەينەتكەرلەر كوپ. كارانتين شارالارىنا بايلانىستى بيىل شەكتەۋلەر بولدى. سوندىقتان نۇرسۇلتان شىڭىنا تاجىريبەسى بار 100 ادام عانا شىقتى. ءبىز قاتىسۋشىلاردى كومسومول شىڭىندا ارنايى جابدىقپەن قامتاماسىز ەتەمىز. شىمبۇلاقتا كونسەرتتىك باعدارلاما مەن ۇتىس ويىندارىن ۇيىمداستىردىق. ەڭ باستىسى، ادامدار ءدان ريزا، بەلسەندىلىك تانىتتى. قالا اكىمدىگى مەن سپورت باسقارماسىنا قولداۋ كورسەتكەندەرى ءۇشىن العىس ايتامىز"، – دەدى "سپورتتىق الماتى" جوباسىنىڭ جەتەكشىسى ەرجان مۇحانوۆ.
"سپورتتىق الماتىنىڭ" تاجىريبەلى الپينيستەرى شىمبۇلاققا دەيىن (2380 م)، ودان كەيىن تالعار اسۋىنا دەيىن (3200 م) ءوتتى، بوگدانوۆيچ مۇزدىعىنا دەيىن (3600 م) كوتەرىلىپ، كومسومول اسۋىن (4000 م) باعىندىرىپ، نۇرسۇلتان شىڭىندا (4376 م) مارەگە جەتتى. الپينيستەردىڭ ايتۋىنشا، نۇرسۇلتان شىڭى قالانىڭ كەز-كەلگەن جەرىنەن كورىنەدى. قاتىسۋشىلار ەڭ كوپ تارالعان ءتاسىلدى - تالعار اسۋى ارقىلى كوتەرىلۋدى تاڭدادى. مانشۇك مامەتوۆا اسۋى ارقىلى دا نۇرسۇلتان شىڭىنا شىعۋ مۇمكىندىگى بار.
شىڭدى باعىندىرۋعا قاتىسقان الماتىلىق ۆالەنتينا مۇزدىقتان وتكەن كەزدەگى اسەرىمەن ءبولىستى.
"مەن الپينياداعا ءبىرىنشى رەت قاتىستىم. بۇل ءبارىمىز ءۇشىن ورتاق مەرەكە. ءبىز تاۋعا شىعۋدى تاڭعى التىدا باستادىق. بۇگىن بوگدانوۆيچ مۇزدىعىنا جەتتىك (3600 م). ۇيىمداستىرۋشىلارعا ۇلكەن راحمەت! تابيعات اياسىنداعى تازا اۋا، كوڭىل-كۇيىمىز دە كەرەمەت. وسىنداي قىزىقتى ءىس-شارالارعا كوبىرەك بارعىم كەلەدى، – دەيدى الپينيادا قاتىسۋشىسى ۆالەنتينا دميترييەۆنا.
بولاتبەك بەيسەنوۆ تە ءوز اسەرىمەن ءبولىستى:
"بۇگىن الپينياداعا بايلانىستى تاڭعى بەستە نۇرسۇلتان شىڭىنا شىعۋ ءۇشىن كەلدىم. جاسىم 55-تە. جاعدايىم جاقسى. تاۋعا كوتەرىلۋ وزىڭە دەگەن سەنىمدى كۇشەيتەدى. مەنەن دە جاسى ۇلكەن قاتىسۋشىلار بولدى. ءار ءتۇرلى جاستاعى ادامدارمەن بىرگە الپينياداعا قاتىسىپ، تاۋعا شىعۋ قىزىقتى".
ايتا كەتسەك، "شىمبۇلاق – نۇرسۇلتان شىڭى" الپينياداسى جىل سايىن الماتى تۇرعىندارى اراسىندا سالاۋاتتى ءومىر سالتىن ناسيحاتتاۋ ماقساتىندا وتكىزىلەدى. بيىل بۇل ءىس-شارا ق ر تاۋەلسىزدىگىنىڭ 30 جىلدىعىنا ارنالدى. ۇيىمداستىرۋشىلاردىڭ ايتۋىنشا، بۇل - ەلدىڭ جەتىستىكتەرىن باعالاۋعا بولاتىن ەرەكشە كۇن.