ول قاراجات اشم-دىكى دەگەن اقپارات شىندىققا جاناسپايدى
ۇرلانعان قاراجاتتى رەسەيلىك ازاماتشادان ءوندىرىپ الۋ تۋرالى تالاپ ارىزدى اۋىل شارۋاشىلىعى مينيسترلىگى ەمەس، ەكولوگيا، گەولوگيا جانە تابيعي رەسۋرستار مينيسترلىگىنىڭ كوميتەتى بەرگەن، دەپ حابارلادى Almaty-akshamy.kz ق ر اۋىل شارۋاشىلىعى مينيسترلىگى باسپا ءسوز قىزمەتىنىڭ حابارىنا سىلتەمە جاساپ.
بۇقارالىق اقپارات قۇرالدارىنداعى ق ر اۋىل شارۋاشىلىعى مينيسترلىگى بيۋدجەت قاراجاتىن ءوندىرىپ الۋ تۋرالى تالاپ ارىز بەرگەنى تۋرالى حابارلاما دۇرىس اقپارات ەمەس، دەپ حابارلادى اشم باسپا ءسوز قىزمەتى
ءبىرقاتار قازاقستاندىق ب ا ق رەسەيدىڭ «ۆەستي ومسك» اقپاراتتىق پورتالىنا سىلتەمە جاساي وتىرىپ، سۆەتلانا كيرشوۆاعا قاتىستى سوت پروسەسى تۋرالى اقپارات تاراتتى. ول الاياقتىق جاساپ، ق ر اۋىل شارۋاشىلىعى مينيسترلىگىنىڭ شوتىنان اسا ءىرى كولەمدە قارجى ۇرلادى دەپ ايىپتالۋدا. اقپاراتتىق ماتەريالداردا رف ازاماتشاسى سۆەتلانا كيرشوۆاعا قاتىستى جۇرگىزىلگەن قىلمىستىق ءىس اياسىندا قازاقستاننىڭ اۋىل شارۋاشىلىعى مينيسترلىگى ۇرلانعان بيۋدجەت قاراجاتىن ءوندىرىپ الۋ تۋرالى تالاپ ارىز بەرگەن دەپ كورسەتىلگەن.
نەگىزى، بۇل حابارلاما دۇرىس ەمەس جانە بۇقارالىق اقپارات قۇرالدارىنىڭ وقىرماندارى مەن كورەرمەندەرىنە تەرىس اقپارات تاراتۋدا. بۇل قاتەلىك رەسەيلىك اقپارات كوزدەرىنىڭ قازاقستان رەسپۋبليكاسىنىڭ ورتالىق بيلىك ورگاندارىنىڭ قۇرىلىمى تۋرالى بىلمەگەندىگىنەن بولىپ وتىر.
وسىعان بايلانىستى ق ر اشم كەلەسىنى حابارلايدى:
شىن مانىندە، قىلمىسكەر بيۋدجەت قاراجاتىن سۋ رەسۋرستارى كوميتەتىنىڭ ەسەبىنەن 2003 جىلى ۇرلاعان، ول كەزدە بۇل مەكەمە ق ر اۋىل شارۋاشىلىعى مينيسترلىگىنىڭ قۇرىلىمدىق بولىمشەسى بولعان.
الايدا، «قازاقستان رەسپۋبليكاسىنىڭ مەملەكەتتىك باسقارۋ جۇيەسىن ودان ءارى جەتىلدىرۋ جونىندەگى شارالار تۋرالى» ق ر پرەزيدەنتىنىڭ جارلىعىنا سايكەس، 2019 جىلدىڭ ماۋسىم ايىنان باستاپ سۋ رەسۋرستارى كوميتەتى ەكولوگيا، گەولوگيا جانە تابيعي رەسۋرستار مينيسترلىگىنىڭ قاراماعىنا ءوتتى.
سوندىقتان، ق ر اۋىل شارۋاشىلىعى مينيسترلىگى ايىپتالۋشى رەسەيلىك سۆەتلانا كيرشوۆادان قاراجات ءوندىرىپ الۋ تۋرالى تالاپ ارىز بەرمەگەنىن حابارلايمىز.
بەلگىلەنگەن وكىلەتتىكتەرگە سايكەس، مەملەكەت اتىنان تالاپ ارىزدى قازاقستان رەسپۋبليكاسى ەكولوگيا، گەولوگيا جانە تابيعي رەسۋرستار مينيسترلىگىنىڭ «سۋ رەسۋرستارى كوميتەتى» رەسپۋبليكالىق مەملەكەتتىك مەكەمەسى بەرگەن.