قازاقستان-يتاليا بيزنەس-فورۋمى اياسىندا ءوزارا ءىس-قيمىل مۇمكىندىكتەرى تالقىلاندى.
ءىس-شارا ەكى ەلدىڭ سىرتقى ساياسي ۆەدومستۆولارى، يتاليانىڭ «Confindustrie» ونەركاسىپ جالپى كونفەدەراسياسىنىڭ، ICE اگەنتتىگىنىڭ، «Kazakh Invest» ۇلتتىق كومپانياسىنىڭ جانە «اتامەكەن» ۇكپ-نىڭ قولداۋىمەن ۇيىمداستىرىلدى، دەپ حابارلادى Almaty-akshamy.kz. ق ر سىرتقى ىستەر مينيسترلىگىنە سىلتەمەلەپ.
فورۋمدى ق ر پرەمەر-مينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى مەن يتاليا رەسپۋبليكاسىنىڭ سىرتقى ىستەر جانە حالىقارالىق ىنتىماقتاستىق ءمينيسترى لۋيدجي دي مايو اشتى.
م.تىلەۋبەردى ءوز سوزىندە 1992 جىلدان باستاپ يتالياندىق كومپانيالار ءبىزدىڭ ەلىمىزگە شامامەن 9 ملرد اقش دوللارىن ينۆەستيسيالاعانىن جانە بۇگىندە قازاقستاندا يتالياندىق كاپيتالى بار 270-تەن استام كاسىپورىن تابىستى جۇمىس ىستەپ كەلە جاتقانىن اتاپ ءوتتى. ءبىزدىڭ ەلىمىزدە 1992 جىلدان بەرى جۇمىس ىستەپ كەلە جاتقان جانە مۇناي-گاز سالاسىندا ءبىرقاتار ماڭىزدى جوبالاردى ىسكە اسىرعان يتالياندىق ENI ترانسۇلتتىق كومپانياسىنىڭ قازاقستان ەكونوميكاسىنا قوسقان ۇلەسى ەرەكشە اتاپ ءوتىلدى. سونىمەن قاتار، سوڭعى جىلدارى قازاقستاندا جاڭارتىلاتىن ەنەرگيا كوزدەرى سالاسىنداعى اقتوبە وبلىسىندا جەل ەلەكتر ستانسياسىنىڭ قۇرىلىسى جانە تۇركىستان وبلىسىندا كۇن ەلەكتر ستانسياسىنىڭ قۇرىلىسىن باستاۋ سياقتى جاڭا جوبالار تابىستى ىسكە اسىرىلۋدا.
ءىس-شاراعا 600-گە جۋىق قازاقستاندىق جانە يتالياندىق بيزنەسمەندەر قاتىستى. يتالياندىق ينۆەستورلارعا قازاقستاندىق ەكونوميكانىڭ اگروونەركاسىپتىك كەشەن، جاڭارتىلاتىن ەنەرگيا كوزدەرى، ماشينا جاساۋ جانە باسقا دا سەكتورلارداعى جوبالار تانىستىرىلدى. ولار جاقىن ارادا يتالياندىق "NEOS" كومپانياسىنىڭ ميلان مەن الماتى اراسىنداعى تىكەلەي اۋە رەيسىن ىسكە قوسۋىن قۇپتادى. اتالعان اۋە قاتىناسى ەكى ەل اراسىنداعى ىسكەرلىك جانە تۋريستىك بايلانىستاردى دامىتۋعا ەلەۋلى ۇلەس قوسۋى ءتيىس.